Kim Leinep Nuummi inuunerisimasani takoqqikkaa
![](/sites/default/files/styles/image_934x467/public/article_images/kimleinegyldendal.jpg?itok=q04OgHyJ)
Kim Leine DR-ip TV-aneersunik ilaqarluni illoqarfimmi ukiorpaalunni avatangiiserisimasaminik takusaaqqillunilu oqaluttuarinninniarluni januaarimi Nuummiippoq.
Misigisimasaq nuannerlunilu piviusorpalaanngitsutullu nassuaatigaa.
- Eqqumiippoq, putusunni assiliuteqaannavikkama arajutsisinnaanngivippunga. Taamaalilluni misigisamut tamanna ilaaoq, Kim Leine KNR-imut oqarpoq.
AAMMA ATUARUK Kim Leine nomineret til fornem litteraturpris
Kim Leine 1990-ikkunni 2000-illu aallartinnerani ilaquttani ilagalugit Nuummi najugaqarpoq tassanilu Dronning Ingridiup Napparsimmavissuani SANA-mi peqqissaasutut atorfeqarluni. Tamatuma saniatigut imerajuttuuvoq, allasiortarluni ikiaroornartunillu ”Sana”-mit iisartakkanik sulinermini tillittakkaminik atornerluileraluttuinnarsimalluni
Kim Leinep Nuummi misigisimasani atuakkiaqqaamini ”Kalak”-mi 2007-imi saqqummersumi oqaluttuarai.
Suleqatigisimasani takoqqikkai
Kim Leine 2004-mi atornerluijunnaarpoq. Nuummili atornerluinermini aqqusaarsimasani puiorsimanngikkai tv-ikkut immiussinermi takuneqarsinnaalluarput.
- Inunnik saaffigisaqarnissara isiginnaarusiamut saqqummertutut misiginarmat akunnattoorfigilaarsimavara. Taamaammat misigisamut annikillisaataavoq. Kisiannili aamma ajunngitsuuvoq, Tassami Kalaallit Nunaanniikkaangama misigisartakkakka ajunartoortutut tamaviaartutullu misigisimaneq misiginngilakka. Akisussaaffimmi assiliisumut tusagassiortumullu tunniuttuusiinnarpara, Kim Leine oqarpoq.
AAMMA ATUARUK Kim Leine Nunatsinnut tunngasumik nutaamik atuakkiortoq
Atuakkiortup nunarput arlaleriarluni tikittarsimavaa, Sanali aatsaat ukioq manna januaarimi aatsaat iserfigeqqippaa suliffigisimasanilu suleqatigisimasanilu takoqqillugit. Taakkunanilu suliffimmi peqqissaasoq Kim Leinep atornerluisuuneranik paasititsisoq ilaavoq.
- Taamani suleqatigisanniit ikiorluarneqaqaanga taamaammat kingunerluppallaanngilaq. Naapitsigaangamali kanngusulaartarpunga. Qimerluutaartarlungalu suleqatikunik ilassisassaqarnerlunga takuniarlugu, Kim Leine oqarpoq.
Atuakkiaq nutaaq
Kim Leine Nuummiinnermini ornigarneqarluartumik Sanami oqalugiarpoq, atuakkiaminullu Hans Egedemut nunasiamillu ”Godthåb”-imik pilersitsinermut tunngasumut atugassaminik oqaluttuarisaanermik misissuingaatsiarluni.
- Kalaallit Nunaannut attuumanera naammatsinngisaannassavara. Nalorsitsaarutaasaavoq naammassineqanngisaannartoq, taamaalillu atuakkiat tassunga tunngasut takkuttuaannarput, Kim Leine oqarpoq.
Aallakaatitassiaq sapaat juulip 30-ani nunatsinni nalunaaqutaq naapertorlugu nal. 18 DR2-mi aallakaatinneqassaaq.
DR2 online: dr.dk/tv/se/kim-leine-mit-liv-som-misbruger/-/kim-leine-mit-liv-som-misbruger
AAMMA ATUARUK Leinep atuakkiaa nutaaq assigiinngitsunik nalilerneqartoq