Kim Leine nersornaatisisussatut innersuunneqartoq
Atuakkiortup ilisimaneqarluartup Kim Leinep atuakkiani "Profeterne i Evighedsfjorden" pillugu nersornaatisisussatut innersuunneqarpoq.
Atuakkianik saqqummersitsisarfik Gyldendal tusagassiuutinut nalunaarummi taama ilaatigut allaaserisaqarpoq.
Allattoq Mads Lynge
apriilip 16-at 2017 13:30
Kim Leine, qallunaat atuakkiortuisa akornanni kisiartaalluni nersornaammut International Dublin Literary Award 2017-imut innersuunneqarpoq.
Leinep 2012-imi atuakkiani "Profeterne i Evighedsfjorden" nersornaatisissutigissagaa innersuussutigineqarpoq. Palasip Morten Falckip 1700-kkunni Kalaallit Nunaanniinnera atuakkiami tassani allaaserineqarpoq.
International Dublin Literary Award 2017-imi nersornaatisisussaq tamanut juunip ulluisa 21-anni saqqummiunneqassaaq, 745.000 koruuninillu aningaasartaqarluni.
Atuakkiat katillugit 147-t ukioq manna nersornaatisisussatut innersuunneqarput.
Profeterne i Evighedsfjordenilu taakkununnga tassa ilaalluni. Nunani tamalaani atuagaateqarfiit nersornaatisisussatut piukkussatik innersuuppaat.
