Kim Leine Nunatsinnut tunngasumik nutaamik atuakkiortoq
"Profeterne i Evighedsfjorden" 110.000-inngorlugu Danmarkimi naqiterneqarpoq.
Atuakkiortoq affarmik qallunaajullunilu affarmik Norgemiuusoq, Kalaallit Nunaat pillugu arlalinnik atuakkiaqarpoq, Kalaallit Nunaannilu arlaleriarluni najugaqarnikuulluni. Atuakkiaali "Profeterne i Evighedsfjorden" Danmarkimi 2012-imi saqqummersinneqarmat Kim Leine ilisimaneqarlualerpoq.
Atuakkiaq oqaluttuani pingasuni nangeqattaartoq Leinep atuakkiariniarpaa, immikkoortullu aappaat allaleruttorlugu Kim Leinep KNR-imut oqaatigaa.
1728-mit 1735-mut pisut atuakkiami oqaluttuarineqarput, atuakkiamut siullermut naleqqiullugu ukiut 70-it missaat sioqqutsillugit pisut oqaluttuarineqarlutik.
AAMMA ATUARUK Kim Leine Nunat Avannaamioqatigiit Siunnersuisoqatigiivisa atuakkiortumut nersornaataanik nersornaatisivoq
Angutit aqqaneq-marluk arnallu aamma aqqaneq-marluk pineqaatissinneqarsimasut Kalaallit Nunaannukaanneqarnerat ilaatigut oqaluttuarineqarpoq. Angutit arnallu taakku Kalaallit Nunaannukaanneqannginnerminni katititaasimapput, Kalaallit Nunaatalu nutaajunerusup pilersinneqarnissaa pillugu Nunatsinnukaanneqarlutik.
- Tamannalu soorunami iluatsippallaanngilaq, Kim Leine oqarpoq.
Pineqaatissinneqarsimasut amerlanersaat tuberkulosemik, sukulupoornermik nappaatinillu allanit toqquteqarput, soorlu aamma kalaalerpassuit nappaalallutik toqorartut.
Atuakkiortutut Kalak siullertut saqqummersippaa. Atuagaq Kalak Leinep Danmarkimi Kalaallillu Nunaanni inuunermini misigisarsimasaannut tunngavoq.
Tunu, Profeterne i Evighedsfjorden aamma De Søvnløse, aamma atuakkiarai. Taakku aamma Nunatsinnut tunngapput. Taakku saniatigut allanik atuakkiaqarpoq.
Kim Leine ukiuni 15-ini Nunatsinni najugaqarnikuuvoq. Ilaatigut Kulusummi napparsimasunik paarsisutut sulinikuulluni.
Ajoqersuiartortitaq Hans Egede, angakkorlu Aappaluttoq Kim Leinep atuakkiaani nutaami pingaarnertut inuttaapput, atuakkiallu aqqanut "Rød mand - sort mand"-imut naapertuullutik. Hans Egede tassaatinneqarpoq sort mand, angakkorlu Aappaluttoq soorunami rød mandiulluni.
Kim Leinep atuakkiamut nutaamut allaqqitassiaq siulleq maannamut allareerpai. Quppernerillu 500-t atuakkiap saqqummersinneqarnissaata tungaanut ukiuni tulliuttuni allaqqillugit aaqqissussavai.
AAMMA ATUARUK Kim Leinep atuakkiaa ikinnerpaamik tallimanik ulloriannappoq