Kim Leine Nunat Avannaamioqatigiit Siunnersuisoqatigiivisa atuakkiortumut nersornaataanik nersornaatisivoq

Norgep, Danmarkip Nunattalu Nunat Avannaamioqatigiit Siunnersuisoqatigiivisa atuakkiortumut nersornaataanik tunineqarsimanertik isorsisimaarutigisinnaanngorpaat.
Allattoq mlk, Simon Uldum
oktobarip 31-at 2013 05:46

Atuakkiortormi Kim Leine atuakkiaminut Profeterne i Evighedsfjordenimut ataqqinarpaluttumik nersornaammik tunineqarpoq. Namminerlu oqaatigaa 100 procentimik norgemiuulluni, 100 procentimik danskiulluni 70 procentimillu kalaaliulluni, tamannalu anersaaralugu nersornaaserneqarnermini oqaatsit pingasut atorlugit qujassuteqarpoq.

- Kalaallit Nunaannut aamma qujassuteqarusuppunga. Tamassa asavassi! - nersornaaserneqatoq nuannaaqaluni oqarpoq.

Kim Leine Nunatsinni peqqissaasutut ukiuni 15-ini sulisimavoq - misigisartakkanilu atuakkiamini Kalammi Tunumilu oqaluttuarai. Aamma atuakkiaminut kingullermut, Kalaallit Nunaannut ajoqersuisartorneq pillugu atuakkiassami pingasut siullersaannut, Politikenip atuakkiortumut nersornaataanik aamma De Gyldne Laurbærinik nersornaaserneqarsimavoq.

Kim Leinelli ajugaaneratigut Mariane Petersen atuakkiortumut nersornaammik aappassaanik tunineqanngitsoorpoq. Aammattaaq Nuka Godtfredsen Martin Appeltilu meeqqanut inuusuttunullu nersornaammut nutaamut innersuunneqarsimasut tunineqanngitsoorput. Nersornaat nutaaq Finlandimiunut Seita Vuorelamut Jani Ikonenimullu atuagaq Karikko pillugu tunniunneqarpoq.

Naak Kalaallit Nunaat Nunat Avannaamioqatigiit Siunnersuisoqatigiivisa atuakkiortumut nersornaataanik tunineqarsimanngikkaluartoq, atuakkiortumik danskimik nunatsinni sorlaqarfeqartumik aappassaanik nersornaasiisoqarpoq. Naja Marie Aidtimi 2008-mi nersornaaserneqarpoq. Taannalu Aasianni peroriartorsimavoq.

Nersornaatit 350.000 koruuninik aningaasartaqarput.