Kim Leinep atuakkiaa ikinnerpaamik tallimanik ulloriannappoq

Atuakkami 500-nik quppernilimmi oqaluttuarisaanermut tunngassuteqartumi, tallimanngormat saqqummersumi, Maniitsup eqqaani 1700-kkunni pisimasuutinneqartumi, nunasiaatillit kalaallillu kulturikkut aporaannerat sammineqarpoq - qallunaap/norgemiup palasip, kalaallillu, akerliuniartut pruffiitit akornanni aporaanneq oqaluttuarineqarluni

Aviisip Politikenip Leinep atuakkiaa tallimanik ulloriannatsikkamiuk ilaatigut oqaatigaa, atuagaq tamanit tusaamaneqalertariaqartoq.

Aviisip Informationip atuagaq taavaa, "pingaarutilik suliarilluagarlu aamma qallunaat pisuussuteqanngitsutut isigineqarnerannut eqqaassutissatut".

Aviisip Berlingskep aamma tallimanik ulloriannatsitsinerminut atatillugu atuagaq "soqutiginarluinnartutut, atualeraannilu iperaruminaatsutut", taavaa, Weekendaviisillu atuagaq 'alutornartorsuartut' taallugu.

-Kim Leinep allannermini Kalaallit Nunaat inuttaalu takorlooruminarluinnartunngortippaat, soorlulusooq innermut, immaqa kalaallit qulliineersunut, inngiasulluni assammik assersorluni, sikorsuaqarnera ilulissalluunniit pissutigalugit qiiaammisaarluni, nujaasaqarluni kummassimalluni kumilluni orsorsunnilluni kiagullunilu naammagittaalliorluni, atuagaq pillugu Weekendaviisimi allapput.

Atuagassiami Kristeligt Dagbladimi Kim Leine ima nersorpaat: - Ajornartorsiuteqanngitsutut, uppernarluinnarluni tiguaasinnaallunilu allakkami, oqaluttualiamini inunnut ilisimasani uummaarissumik allaaserai.

Aviisimi Nordjyske Stiftstidendemi ima allapput.

- Paarisiuk nuannaartoralugulu pingaartissiuk". Leine qallunaat atuakkiortut ataqqisaanerpaat ilagaat. Atuagarlu Nordjyske Stiftstidendep arfinilinnik ullorialerpaa.

Profeterne i Evighedsfjorden" - "Kangerlussuatsiami pruffiitit" - Gyldendalip saqqummersippaa, Nunatsinnilu atuagaarniarfinni aamma pisiassaajumaarpoq.