Savalimmiuni neriniartarfiup Michelinip nersornaasiuttaagai tigumminnaarpai

Taakkunannga 24-t danskit neriniartarfiinut tunniunneqarput marlullu savalimmiormiut neriniartarfiannut Koks-imut tunniunneqarlutik, Koks taamaalilluni siorna marlunnik michelininnattoq nunarsuarmi neriniartarfinni nuiumanerit ilaanniiginnarpoq.

Neriniartarfimmi Koks-imi igasuuneq, savalimmiormiu, Poul Andrias Ziska nersornaammik pilersinneqaqqammersumik, grønne femkløverimik aamma tunineqarpoq, taanna neriniartarfiit igaffimminni immikkut attanneqarsinnaasutsimik siuarsaaniarnermut immikkut iliuuseqarsimanerannut malunnartitsineruvoq.

Matumani nerisassanik eqqaasarnerup killilersimaarnissaanik, akuutissalersuinani naatitsinermik salliutitsinermik najukkamilu nioqqutissianik atuineq  assersuutigineqarsinnaapput.

Michelin naapertorlugu michelininik marlunnik ullorialiineq neriniartarfiup aqqusaagassaqqissuuneranik isumaqarpoq. Tamannalu neriniartarfimmut Koks-imut tulluarpoq.

Neriniartarfik KOKS qeqertami Streymoyimi Frammi við Gjónnamiippoq, tamaani pisanik nerisassiortarluni. Savamit nikku - skærpekød, eqqusat, qilanngarlu nerisassannaavinut ilaallutik.  

Nunarput michelinannattuni ajoraluartumik suli ilanngutinngilaq.

Neriniartarfiulli allap – René Redzepip igasuuffigisaa, Noma Christianshavnimiittoq kalaallit nerisassaataanik atugaqartartup Koks-itulli michelinaatini marluk tigummiinnarpai.

René Redzepi aamma nutaamik nersorneqarpoq, tassalu grønne femkløverimik piujuartitsinermut nersornaaserneqarluni.