USA-p Kalaallit Nunaat assammik arsarnermi unammillerpaa
VM-imut annguteqqeriarnissamut piareersarneq kalaallit arnat assammik arsarnermi nunanut allanut unammisartut aallartisalereerpaat.
VM-imut anngunniunneq Canadami decembarimi pissaaq ilimanarluni iligiit arfineq pingasut tassani peqataassasut. Kalaallit Canada upernaaq unammigamikku qularnaatsumik ajugaaffigaat. Maannalu qujarunnartumik saaffiginnittoqarpoq.
- USA-miit aperipput nunanut allanut unammisartuvut decembarimi unammisinnaanersut, tamannalu akueraarput naak decembarimi anngunniuteqatigisussaagaluarlugit, nuna tamakkerlugu sungiusaasoq Jakob Larsen KNR-imut oqarpoq.
Canada peqataarusuppoq
VM-imut 2025-mi anngunniunnermi USA peqataagami sisamaattut inissippoq Canada bronzennattoq. Cuba VM-imut taamanikkut annguttuuvoq.
- Isumaqarpunga USA-mut unammigutta ilisimasaqarnerulissasugut aamma ilimagaara taakkunannga ilisimasaqarnerulissalluta, Jakob Larsen oqarpoq.
- Canadamiut aamma saaffiginnipput unammeqqikkusulluta naak apriilimi ajugaaffigingaatsiareeritsik. Kisianni pitsaassagaluaqaaq VM-imut anngunniunnissaq sioqqullugu USA Canadalu unammisinnaagaanni, Jakob Larsen oqarpoq.
Marseqattaapput
Iligiit Caribiamiut videokkut isiginnaareerpai taakku Caribiami aasaleqqaarnerani pissartanngorniummata. Aamma Pan-American Games aggustimi pisussaavoq 2028-imi OL-eqarnissaanut anngunniunnermut atatillugu. Tassani unamminernit videolianik Jakob Larsen tuniumaneqareersimavoq.
- Uagut sungiusaammik unammigaangatta unamminitta videotaa taakku aamma aasinnaasarpaat uatsinnut piareersarnerminnut atugassamik. Taamaattumik assut marseqattaanneqarpoq.
- Amerikap avannaani pissartanngorniunnermi ajugaaniuttut pikkorissuupput piareersarluarsimasut taktikkimullu ilisimasaqarluartuullutik. Piareeqqaanniuttoqarpoq timikkut, eqqarsartaatsikkut taktikkimullu tunngatillugu. Tassani unammineq uuttuutigineqarsinnaasuni tamani aallartereerpoq, Jakob Larsen oqarpoq.
Kalaallit arnat assammik arsartartut aggustimi sungiusaqatigiissapput tassanilu Horsens kakkannerpaani håndboldligami unammisartoq aamma GOG kakkannerpaat tullianni 1. divisionimi unammisartoq unammissallugu.
