Inassuteqartoqaraluartoq parnaarussat 62 procentit sinnerlugit misiliutaasumik iperagaanissamut itigartinneqartut
Danmarkimi parnaarussiviit kisitsisaataat naapertorlugit 1980-imi parnaarussat 10 procentii itigartinneqartarsimapput. Tamanna apriilimi 2026-mi 62,4 procentinut amerleriarsimapput.
Kisitsisit Justitsmonitorip Politikenillu allagaatinik takunnikkumanerminnit paasissutissaq pissarsiarisimavaat.
Kisitsisit naapertorlugit 2015-imi itigartinneqartut 26 procentiupput, 2024-milu 59 procentiullutik.
Misiligutaasumik iperagaaneq pillugu najoqqutassiami allassimavoq; pineqaatissinneqartoq eqqartuussutigineqarsimasup pingajorarterutaasa marluk naammassereerpagit misiligutaasumik iperagaaneq nalinginnaasumik pisinnaasariaqartoq.
Najoqqutassiarli naapertorlugu immikkut pisoqartillugu tamanna itigartitsissutigineqarsinnaavoq.
Itigartitsisoqarsinnaanera
Danmarkimi pinerlutsaalisitsinermut inatsimmut siunnersuisoqatigiit 1987-imi isumaliutissiissutaat naapertorlugu; aatsaat pineqaatissinneqartoq inatsisinik unioqqutitsisarluni naatsorsoruminaappat itigartitsisoqassasoq, ikittuinnaallu misiligutaasumik iperagaanissamut itigartinneqartariaqartut allassimavoq.
"Inassutigiuminaatsoq" qanoq paasineqassanersoq allanngorsimasoq, Kalaallit Nunaanni Pinerluttunik Isumaginnittoqarfimmi siornatigut pisortaasimasoq Hans Jørgen Engbo Politikenimut oqarpoq.
Oqaatsip isumaa allanngortoq
Siusinnerusukkut tamanna isumaqartarpoq; pineqaatissinneqartoq pinerluuteqaqqinnissaanut aarlerinaateqarpallaarpat itigartitsisoqassaaq. Inuiaqatigiinni maannakkut ilaatigut sungiusaqqinneqarnissamut peqataaneq, oqarasuaatinik angallattakkanik inatsisinik unioqqutitsisumik atuisimaneq ilanngullugit naliliinermut ilaatinneqartarput.
Danmarks Fængslerip nalunaarusiaani itigartitsinerit ikilisarnissaat immikkut ukkatarineqartoq oqaatigineqarpoq.
-Itigartitsinerit amerliartornerat eqqumaffigaarput. Taamaattumik allannguutip tunuliaqutaa misissuleruttorparput, aqutsisoqarfik siusinnerusukkut akissummini Justitsmonitorimut Politikenimullu allappoq.
Danmarkimi pinerlutsaalisitsinermut inatsimmut siunnersuisoqatigiit inatsisinut 2024-mi taamanikkut ministeriusumut Peter Hummelgaardimut misiligutaasumik iperagaasarneq pillugu inassuteqaatinik nassiussaqarpoq.
Ilaatigut immikkut pisoqartillugu pineqaatissiissutip affaa naammassigaanni, sivikinnerpaamillu qaammatit marluk parnaarussereeraanni, inuiaqatigiinni sullissinermik akuersisoqarpat, misiligutaasumik iperagaanissaq periarfissaassasoq siunnersuutigineqarpoq.
Socialdemokratit 2021-mi naalakkersuisuunerminni inatsisissatut siunnersuummik, inatsisinut ministeriusoq Nick Hækkerup Danmarkimi parnaarussivinni aalajangersimasumik parnaarussat ikilisarneqarnissaat siunnersuuteqarput.
