Arfanniarneq: EU-p Danmark inerteqquteqalernissamut tatiniarpaa
![](/sites/default/files/styles/image_934x467/public/article_images/grindehvaler_soede_630.jpg?itok=2WUpWlR_)
Inuussutissarsiutigalugu tikaagullinniarneq, niisarnarniarneq allanilli arfernik mikisunik piniarneq inerteqqutaalerli.
EU-kommissioni Arfanniarneq Pillugu Ataatsimiititaliarsuarmi, IWC-mi, ataatsimiilinnginnermi taama kaammattuivoq. Kommissionip oqaaseqaasiorluni EU-mi ilaasortat arfernik mikisunik piniarnermik inerteqquteqalernissaanut tapersersoqatigeeqqullugit kaammattorpai.
EU-p imartaani ullumi arfanniarnissaq inerteqqutaavoq, kommissionili naapertorlugu arferit nuttartuummata, inerteqqut nunarsuaq tamakkerlugu atuuttariaqarpoq.
Naalakkersuisut: Naalagaaffeqatigiit soqutigisaannut naapertuutsikkuminaattoq
Danskilli naalakkersuisui taamaaliornissamut piareersimanngillat.
Nunanut allanut tunngasunut ministeri, Anders Samuelsen Issittumi pissutsit pillugit Folketingimi oktobarip 26-ani oqallinnermi Kommissionimiit kaammattuut pillugu ima oqarpoq:
- Kunngeqarfimmiit Kalaallit Nunaanni Savalimmiunilu pissutsit soqutiginissaannut pisussaaffeqartugut soorunami isumaqarpunga, isumaqarpungalu taamaanneranut paasinninneq annerujartuinnartoq.
AAMMA ATUARUK Arfernut eqqissisimatitsiviliornissamik siunnersuut itigartitsissutigineqartoq
Samuelsen Savalimmiut pillugit Kalaallit Nunaallu pillugit ataatsimiititalianut kingusinnerusukkut akissummini allappoq, nunarsuarmi tamarmi arferit illersorneqarsinnaanngitsumik piniagaanerannut Kommissionip isumaa Naalakkersuisut isumaqatigigaat.
Aammali Kalaallit Nunaata Savalimmiullu imaanik pisuussutinik atuinerisa, ilisimatuut isaanni imminut nappassinnaatillugu, eqqarsaatiginissaat danskit naalakkersuisuisa pingaarnerutikkaat.
’Taamaammat Kommissionip siunnersuutaa Naalagaaffeqatigiit tamarmiusut soqutigisaannut naapertuutsikkuminaassinnaapput’ nunanut allanut tunngasunut ministeri allappoq.
Arfanniarneq inuussutissarsiutitut imaluunniit naamik
kalaallit, Islandimiut Savalimmiormiut Danmarkillu Norgelu Atlantikup nammineq avannaani immami miluumasut pillugit ataatsimiititaliarsuarmi, NAMMCO-mi, Arfernik mikisunik piniarnermi malittarisassaliortarput.
Arferit angisuut piniagaanerat pineqartillugit malittarisassat IWC-mi aalajangersorneqartarput, tassanilu inuussutissarsiutigalugu arfanniarneq inerteqqutaavoq - naak aamma inerteqqummut ilaanngitsoqaraluartoq. Tassami ilaatigut Nunarput Savalimmiullu inerteqqummi pineqanngillat, nunap inoqqaavi pillugit FN-imi isumaqatigiissummit illersorneqartumik arfanniarneq qangatut piniarnertut isigineqarmat.
AAMMA ATUARUK Atlantikup kujasissortaani arfernik eqqissisimatitsiveqalernissaq assortuussutaasoq
EU-Kommissionili isumaqarpoq, Kalaallit Nunat Savalimmiullu immikkut pineqarlutik arfernik mikisunik suli piniarsinnaassasut. kisianni taamaallaat inuuniarnerup attanniarnerani pisariaqarallartillugu taamaassalluni.
Taamali oqaasertaliineq naammanngitsoq, Folketingimi partiit arlallit oqarput.
Aviisi Information naapertorlugu, partiit Enhedslisten, Dansk Folkeparti aamma Socialdemokraatit EU-kommissionip siunnersuutaa tapersersunngilaat.
- Pisanit neqi ammillu tunineqarsinnaanngippata, inuiaqatigiinni taakkunani allamik inuussutissaqangaanngilaq, Peter Hummelgaard Thomsen Socialdemokratineersoq Informationimut oqarpoq.
Tusarniaanermut akissutit assigiinngitsut
EU-kommissionip siunnersuutiminut tusarniaarnerani KNAPK akissuteqarluni allappoq. "Kikkut, qaqugukkut qanorlu arfernik angisuunik arfanniartassanersut, nuna namminneq aalajangigassarigaat. Pingaarnerpaavoq neqimik pilersuisoqarnissaa".
Uumasuunik illersuiniaqatigiit suleqatigiiffiat, DOSO, EU-kommissionip siunnersuutaanut apeqqusiinertaqanngitsumik tapersiivoq.
EU-kommissionimiit inassuteqaatit EU-mi ministereqatigiinni oqallisigineqaqqaassapput. Siunnersuut IWC-mut ingerlateqqinneqassappat, nunat EU-mut ilasortaat ikinnerpaamik 55 procentii akuerseqqaartariaqarput, taakkualu akuersisut inui EU-p inuisa katinnerisa ikinnerpaamik 65 procenterisariaqarlugit.
AAMMA ATUARUK Japan trodser fangstforbud igen og lander 177 hvaler