Arfernut eqqissisimatitsiviliornissamik siunnersuut itigartitsissutigineqartoq
![](/sites/default/files/styles/image_934x467/public/article_images/sildepisker_tikaagullik_ron_dunnington_flickr.jpg?itok=TvmMpT4A)
Atlantikup kujasissortaata ilaani arfernut eqqississimatitsiveqarnissaa nunat latinamerikameersut Afrikameersullu ilaat siunnersuutigigaluarpaat, imartap 20 millionit kvadratkilometerisut annertutigisup arfernut eqqissisimatitsiviunissaa siunnersuutaalluni.
Nunat pineqartut EU-mit, Danmarkimiillu nunanillu allanit tapersersorneqarput, amerlanerussuteqarsinnaasimanatilli.
Aamma atuaruk Atlantikup kujasissortaani arfernik eqqissisimatitsiveqalernissaq assortuussutaasoq
Eqqissisimatitsiviliortoqarniannginnerali ajuusaarutigineqartariaqanngitsoq, biologip arferit pillugit immikkut ilisimatusarsimasup Karl Kinzep oqaatigaa.
![](/sites/default/files/styles/image_934x467/public/hvalreservat_0.jpg?itok=0JzknZwQ)
Taamatulli siunnersuuteqartoqarnera takussutissaannartut isigisariaqartoq aamma oqaatigaa:
- Arferit pillugit annerusumik ilisimaqartoqaraluarpat pitsaanerussagaluarpoq, sumi piaqqiortarnersut, sumullu ingerlaartarnersut ilisimasaqarfigalugu, asuli eqqissisimatitsiviliuinnarnani, Karl Kinze oqarpoq.
Arfernulli eqqissisimatitsiviliortoqarniannginnera John Frizellip, Greenpeacemeersup, ajuusaarutigaa.
Arferit ukiorpassuarni piniagaasimanerat pissutaalluni ikiliartupiloorsimasut taassuma franskit nutaarsiassaqartitsiviannut AFP-mut oqaatigaa. Arfernullu eqqissisimatitsiviliornissaq pisariaqarsoraa.
Arfernut eqqissisimatitsivimmik pilersitsisoqarnissaa 2001-imili ukiut tamaasa siunnersuutigineqartarsimavoq, IWC-milu amerlanerussuteqartunit maanna aamma itigartitsissutigeqqinneqarluni.