Atlantikup kujasissortaani arfernik eqqissisimatitsiveqalernissaq assortuussutaasoq
Arfanniartarneq pillugu nunat tamalaat ataatsimiititaliarsuata IWC-ip Sloveniami ataatsimiinnissaa qaammatip matuma ingerlanerani pisussaq sioqqullugu taama pisoqarpoq.
Nunat EU-mut ilaasortat allat Issittup imartaata kujasissortaata ilaani arfernik eqqissisimatitsiviliortoqarnissaanik, taamaatullu imartami tassani arfanniaqqusaajunnaarnissamik siunnersuutaat danskit nunanut allanut ministeriata Kristian Jensenip taperserniarpaa. Nunatta Savalimmiullu siunnersuummut akerliugaluartut taamaaliorniarpoq.
Savalimmiormiu Folketingimi ilaasortaq, Sjurdur Skaale, Savalimmiuni nutaarsiassaqartitsivimmut Det Færøske Nyhedsbureau-mut ima oqarpoq:
- Imartat eqqissisimatitsiviusut avannamut siaruaakkiartorsinnaanerat aarlerinartoqarpoq. IWC-ip eqqissisimatitsinissaq pinagu piujuaannartitsinissamik tunngaveqarluni arfanniarneq sammisariaqaraluarpaa.
Aamma Folketingimi ilaasortat Nunatsinneersut Aaja Chemnitz Larsenip Aleqa Hammondillu Folketingi sapaatit-akunnerata siuliani ammarneqarmat suliaq oqaluttarfimmit isornartorsiorpaat.
Amerikami kujallermi Afrikamilu naalagaaffiit sineriallit arlariit Atlantikup imartaata kujasissortaani arfernik eqqissisimatitsiviliortoqarnissaanik kissaateqarlutik arlaleriarlutik IWC-mut saqqummiussaqarsimapput, tamannalu EU-p tapersersorniarpaa.