Nunat Avannarliit ilaqutariittut akaareqatigiinnginnerannik taaneqartartoq unitsinneqarallarpoq
Ukiup attaatsip matuma siorna taamani Naalakkersuisunut siulittaasuusoq Múte B. Egede (IA), malunnaatilimmik aalajangiivoq, Nunat Avannarliit Ministeriisa Siunnersuisoqatigiivini aamma Nunat Avannarliit Siunnersuisoqatigiivini ataatsimiinnerit peqataaffigineqartarunnaarnissaat aalajangiukkamiuk.
– Aaqqissuussinerit peqataasunik assigiinngisitsiffiusut peqataaffigiinnarsinnaanngilakka, Naalakkersuisut siulittaasuat taamani oqarpoq.
Múte B. Egede naapertorlugu Kalaallit Nunaat – Savalimmiut Finlandillu ilaani qeqertat Åland peqatigalugit – Nunat Avannarliit suleqatigiinneranni nikanarnerusutut isigineqarpoq, Norge, Danmark, Finland, Island aamma Sverige pingaarnerusutut isigineqarlutik.
Immaqalumi Kalaallit Nunaata Nunanik Avannarlernik suleqatiginninnermik unitsitsigallarnera iluaqutaasimavoq.
Tassami Nunat Avannarliit Ministeriisa Siunnersuisoqatigiivini allattaaneq Karen Ellemann, tupaallannartumik maanna kaammattuuteqarpoq: Kalaallit Nunaat, Savalimmiut aamma Åland Nunat Avannarliit suleqatigiinnerinut tamakkiisumik ilaasortatut inissisimalertariaqarput.
- Kalaallit Nunaanni Naalakkersuisunut siulitaasuusimasup puullaaqissutai paasilluarpakka (...) Trumpilu’ Det Hvide Hus’-imiitillugu kissaatigisaq pineqartoq piviusunngortinneqarsinnaasariaqarpoq, taama Politikenimut oqarpoq.
Novemberimi apersorneqarnermini Karen Ellemann KNR-imut oqarpoq, nammineq allattaanertut Kalaallit Nunaata Nunat Avannarliit suleqatigiinneranni inissisimanera pillugu isummersorniarani:
– Tamatuma qanoq isummersorfiginissaa nunani naalakkersuisut oqallisigisariaqarpaat, taamanikkut Karen Ellemann oqarpoq.
Peqataajumajunnaarneq unitsittariaqarpoq
Nunani Avannarlerni naalakkersuisut Kalaallit Nunaata, Savalimmiut Ålandillu tamakkiisumik ilaasortanngornerisa qanoq kinguneqarumaarneranik inatsisitigut misissuititsinissamik aalajangiussinerisa kinguninngua Karen Ellemannimit oqaaseqaat saqqummiunneqarpoq.
Tamanna pivoq Nunat Avannarliit suleqatigiiffianni inatsisartut, Nunat Avannarliit Siunnersuisoqatigiivisa, uteriisernerisa kingorna, taakkumi kissaatigaat Helsingforsimi isumaqatigiissut Nunat Avannarliit naalakkersuisuinit nutarterneqassasoq, taamaalillunilu Kalaallit Nunaat, Savalimmiut Ålandilu nunanut ilaasortanut allanut naligiissitaalerlutik.
Taamaammat Mariane Paviasen, Inuit Ataqatigiinniit Inatsisartunut ilaasortaallunilu Nunat Avannarliit Siunnersuisoqatigiivini ilaasortaasoq, isumaqarpoq, ataatsimiinnernut peqataajumajunnaarneq Naalakkersuisut maanna unitsittariaqaraat.
– Uagutsinnut pitsaasuussaaq, Naalakkersuisut Helsingforsimi isumaqatigiissutip nutarternissaa pillugu isumaqatigiinniarnernut peqataappata, suleqatigiiffimmi nunanut allanut naligiissitaaleqqulluta, Mariane Paviasen oqarpoq.
Kalaallit Nunaannut oqartussaaneq annertunerusoq
Mariane Paviasen naapertorlugu Helsingforsimi isumaqatigiissutip nutarternissaa pisariaqarpoq, Nunat Avannarliit Siunnersuisoqatigiivini aamma Nunat Avannarliit Ministeriisa Siunnersuisoqatigiivini nunat avannarliit suleqatigiinnerat ineriartussappat ullutsinnullu naleqqussarneqarluni.
Tamatuma ilaatigut kingunerissavaa Kalaallit Nunaata Nunat Avannarliit Siunnersuisoqatigiivini inissisimanerata patajaallisarneqarnera.
– Danskit naalakkersuisuisa inussiarnisaarnermikkut Nunat Avannarliit Siunnersuisoqatigiivini inissanik marlunnik tuninikuuaatigut, kisianni siunissami tamakkiisumik ilaasortanngussagutta politikerit amerlanerit peqataatittarnissaannut periarfissaqalissaagut, taamaalillunilu oqartussaaqataanerput annertunerulerluni, Paviassen oqarpoq.
Naak Mariane Paviasenip maanna neriuutigigaluarlugu Naalakkersuisut qanittukkut Nunat Avannarliit Ministeriisa Siunnersuisoqatigiivini isumaqatigiinniarnernut peqataasalernissaat, isumaqartuarpoq partiimi siulittaasua eqqortumik aalajangiisoq, siorna matumik matorluilluni suleqatigiiffimmi peqataaneq qimammagu.
– Múte isumaqatigilluinnarpara, suleqatigiinnermik mattussinissaq toqqarmagu. Tamanna qularutissaanngitsumik Nunat Avannarliit Ministeriisa Siunnersuisoqatigiivini politikerit akornanni isummersulersitsivoq, naligisamittut isigilersilluta, taamaalillunilu aamma Helsingforsimi isumaqatigiissutip nutarterneqarnissaanik akuersaalersillugit, Mariane Paviasen oqarpoq.
KNR-ip ulluni arlalinngortuni Naalakkersuisut siulittaasuat Jens-Frederik Nielsen (D) oqaaseqartinniartaraluarpaa, kisianni saaffiginnissutigut qisuarfiginngilai. Apererusukkaluarparput Nunat Avannarliit suleqatigiiffiannik Naalakkersuisut mattussinerat ingerlateqqiinnarniarneraa.
