Nunat Avannarliit Siunnersuisoqatigiivi: Nunatta ilaasortaanera isumaqatigiissutiginiarneqaqqissaaq

Nunatta nunallu avannarliit siunnersuisoqatigiivi atassuteqarluanngereersullu, suleqatigiinnermut isumaqatigiissutip allanngortinnissaa ministerit sulissutigissagaat siunnersuisoqatigiit kaammattuipput.

Allattoq Markus Valentin

novembarip 05-at 2024 14:59

Nutserisoq Steve Pedersen Hinrup

Nunatta Nunat Avannarliit Siunnersuisoqatigiivisalu attaveqarniarnerat kingullertigut nipaappoq.

Nunarput Danmarkilu naligiimmik ilaasortaanissaat nunatsinni Inatsisartunit nipaatsumik sulissutigineqarpoq.

Avannarlerni ministerit siunissami ilaasortaqarneq pillugu suliaqartariaqartut, Nunat Avannarliit Siunnersuisoqatigiivi akerliusoqanngitsumik isumaqatigiipput.

Nunat Avannarliit Siunnersuisoqatigiiffiat suua?

Nunat Avannarliit Siunnersuisoqatigiiffiata Nunani avannarlerni najugaqarneq, inuuneq sulinermilu pissutsit pitsaasut pilersinneqarnissaat suliarisarpaa.

Danmarkimi, Filandimi, Norgemi, Sverigemi, Islandimi, Kalaallit Nunaanni, Savalimmiuni Ålandimilu politikikkut qinikkat suleqatigiiffigaat.

Nunat Avannarliit Siunnersuisoqatigiiffianni ilaasortat tassaapput nunani arfineq-pingasunit inatsisartunut ilaasortat.

Nunat Nunat Avannarliit Siunnersuisoqatigiiffianni nunap inoqassusaa aallaavigalugu ilaasortaatitaat amerlassusilerneqartarput. Kalaallit Nunaannit ilaasortat marluupput, Sverigemiillu assersuutigalugu 20-ullutik.

Nunat Avannarliit Siunnersuisoqatigiiffianni ilaasortat tamarmik siunnersuisoqatigiiffimmi præsidentimit vicepræsidentimillu aqunneqartuni ukiumut marloriarlutik ataatsimiittarput.

Nunat Avannarliit Siunnersuisoqatigiiffiannili ataatsimiititaliat arlaliupput, taakkulu ataatsimiikkajunnerusarput.

Nunani Avannarlerni Ministerit Siunnersuisoqatigiiffiat nunani avannarlerni naalakkersuisut pisortatigoortumik suleqatigiiffigaat. Naalakkersuisut naalakkersuisuuffigisaminnut atatillugu tamarmik immikkut ataatsimiittarput.

Paasissutissarsiffik: Norden.org

Allisiguk

Siunnersoqatigiiffiup suleqatigiinnermut isumaqatigiissut Helsingforsaftalenimik taaneqartartup misissoqqissaarluarnissaa kissaatigaat.

- Nunat avannarlerni suleqatigiit 'tunngaviusumik inatsisinik' pisariaqartitsipput. Tamanna nunat avannerlerni suleqatigiilluartoqarnissaanut aalajangiisuusussaasoq isumaqarpugut, Nunat Avannarliit Siunnersuisoqatigiiffianni præsidenti Bryndis Haraldsdóttir, taama allappoq.

Aamma atuaruk Nunat Avannarliit Siunnersuisoqatigiiffianni præsidenti: Kalaallit Nunaat peqataatikkusupparput

Nunat avannarliit suleqatigiinnermut isumaqatigiissutaasa qanoq isikkoqarsinnaaneri takujumallugit ataatsimiisitaliarsuarmik pilersitsisoqarnissaa kajumissaarutigineqarpoq.

Attaveqatigiinneq nipaatsoq

Nunat Avannarliit Siunnersuisoqatigiivi Nunattalu attaveqatigiinnerat naalakkersuisut siulittaasuannit, Muté B. Egedemit ukioq manna unitsinneqarpoq.

Nunarput Issittumi illersornissaq - sillimaniarnermullu pissutsinut oktoberimi ataatsimiinnermut qaaqqusaanngereersorlu tamanna pivoq.

Nunat Avannarliit Siunnersuisoqatigiivinut ilaginnikkumajunnaarneq paasisaqarfigiuk

Naalakkersuisut siulittaasuat, Muté B. Egede (IA) Nunat Avannarliit Siunnersuisoqatigiivinut ilaginnikkumajunnaarpoq.

Nunarput nunat allat pillugit- illersonissaq sillimaniarnerlu pillugit Islandimi oktoberimi ataatsimiiffiusumi siulersuisoqatigiinnit svenskinit qaaqqusaannginnermi kingorna taamaaliorpoq.

Muté B. Egedep ima oqaaseqarfigaa:

- Nunat avannarliit tikilluaqqunngippatigut inussiarnernerpullu akuerinngikkunikku siunissagissaarnissaannik kissaallugillu neriuuteqarfigiinnarusuppagut. Inissaminiiginnarpoq.

Nunarput immaqalu Savalimmiut Ålandilu nunat allat naligalugit ilaasinnaanerussammata Mette Frederiksen (S) isumaqatigiissutit allanngortinnissai pillugit nunat avannarlerni statsministerinut allagaqarpoq

Allisiguk

Siunnersuisoqatigiillu innersuussutaat malitsigalugu attaveqarniarnerat aaqqiivigineqarsinnaavoq.

Mariane Paviasen Jensen (IA) ima oqarpoq:

- Nunatut naligiimmik pineqarusuppugut. Nunat Avannarliit Siunnersuisoqatigiivinut iluitsumik ilaasinnaanissamik periarfissaqarnissarput pingaaruteqarpoq. Tamannalu nunanit tamanit tamanit naalakkersuisoqarfinnit ataatsimiinnermi taperserneqartoq ersarippoq, tusagassiuutinut nalunaarumminni taama allappoq.

Saqquminngitsumik sulissutigineqartoq

Nunat Avannarliit Siunnersoqatigiivi pillugit siunnersuut nunat avannarliit ministeriinut anngunneqarnissaa nunatta sinniisaat Doris Jensenip (S) Mariane Paviasen suleqatigalugu sulissutigisimavaat.

Muté B. Egedep isumaata akerliganik, Doris Jensenip Mariane Paviasenillu siunnersuisoqatigiinni allannguinissaq anguniarlugu naggatissaa tikillugu suliaqarsimapput.

- Ukiuq kingulleq inissisimaffik allaavoq. Anguniagarput tamanit akerlerineqarpoq. Maannali pissutsit allanngorput, sorsuuteqarlutami partiit- nunallu allat oqaloqatigisarsimavagut. Maanna tapersersorpaatigut, ministereqarfillu aamma tusarnaassaaq.

Isumaqatigiissummi Helsingimi allannguutit

Nunat Avannarliit Siunnersuisoqatigiivisa siunnersuutaat ukioq kingullerli suleqatigiissitanit aallaaveqarpoq.

Nunatta ilaasortaanissaa kisimi sulissutiginngilaat, allanilli suliaqarsimapput, ilaatigut Nunat Avannarliit Siunnersuisoqatigiivisa siunissami suliassaat pillugit suliaqarsimapput.

Illersornissaq- sillimaniarnerlu pillugit politikkit, ilinniarneq, oqaatsit piorsarsimassuserlu, silaannaq, angallanneq avannarlernilu inuusuttut ilaatigut suliarisimavaat. Suleqatigiinnissamut isumaqatigiissummi eqqaaneqanngitsut, siunnersuisoqatigiillu sammineruneqartariaqarsorisaat suliaraat.

Naak Nunat Avannarliit Siunnersuisoqatigiivisa innersuussutigigaluaraat, ministereqarfik nunat avannarliit naalakkersuisut sinniisaannit ilaasortaqartoq aalajangiisussaavoq.

Allisiguk

- Politikki suliffik assoroornartuuvoq, sulissutigisimasarpulli ullumikkut imminut akilerpoq, nunarpummi oqaluttuarisaanermi ilaasumik siuariaateqarpoq, Doris Jensen oqarpoq.

Naak neriulluarneq pigigaluarlugu suliassaq suli naammasseqqajalinngitsoq Doris Jensenip oqaatigaa.

- Tulluusimaarpunga, suliassarli aatsaat aallartippoq. Inatsisitigut qanoq inissisimassanersugut nunat avannarliit iliuutsitigut suliaqartussanngorput, assiganillu inatsisitigut qanoq inissisimanissarput qallunaat, kalaallit savalimmiormiullu naalakkersuisuisa paasiniartussanngorpaat.

- Danmarkili aaqqiissutissamik nassaarnissamik kissaateqarput. Partiit (Nunat Avannarliit Siunnersuisoqatigiivini) ilaasortallu isumaqataapput, nalunaarummik piareersimasumik ministereqarfimmut nassiussissaagut.

Nutaarsiassami kukkunermik nassaarsimaguit uunga allaffigineqarsinnaavugut.