Nunat Avannarliit Siunnersuisoqatigiiffianni præsidenti: Kalaallit Nunaat peqataatikkusupparput

Kalaallit Nunaat peqataatinneqaqqilissaaq, aamma politikkikkut qaffasinnerpaami.

Nunat Avannarliit Siunnersuisoqatigiiffianni siulittaasuat, Bryndís Haraldsdóttir ulluinnarni Islandimi inatsisartuni Altingimi ilaasortaq aalajangiisinnaaguni taamaattoqassagaluarpoq.

Taanna Nuummut ataasinngornermi tikippoq ullunilu pingasuni 'sapinngisamik amerlasoorujussuit' oqaloqatigalugillu tusarnaarniassallugit oqaatigaa. Taassuma islandimiu suleqatini, Oddný G. Harðardóttir Nunat Avannarliit Siunnersuisoqatigiivini vicepræsidentiusoq angalaqatigaa.

Taakku tikeraarnerat maanna nunami aaqqissuisuuffimmit Sverigemit nunat imminnut aquttunit, nunatsinnit, Savalimmiunit Ålandimillu ministerit Stockholmimi maajimi ataatsimiinnerannut qaaqqusinnginnerata kingunerisaanik pivoq.

Aalajangiineq Sverigep ministeriuneranit aalajangerneqarpoq, Nunat Avannarliit Siunnersuisoqatigiiviniillu ataatsimoortumik aalajangigaanani. Aalajangernerli naalakkersuisunit isornartorsiorneqangaatsiarpoq. Bryndís Haraldsdóttirillu qisuariarneq paasisinnaalluarpaa.

- Nunani avannarlermioqatit ilaannik uani peqataanngitsutut misigisoqarnera ajuusaarutigingaatsiarpara, Bryndís Haraldsdóttir KNR-imut oqarpoq, nangillunilu:

- Sverigemiut ministeriunerata nunat arfineq-pingasut tamarmik ataatsimiinnissamut aggersarsimassagai kissaatiginerugaluarpara, aalajangernerli uanga sinnerlugu aalajangernerunngilaq.

Naalakkersuisut siulittaasuata, Múte Bourup Egedep (IA) ataatsimiigiarnissamut qaaqquneqannginneq pissutigalugu Nunat Avannarliit Siunnersuisoqatigiinni ataatsimiinnermi peqataasassanngikkallarnermik nalunaaruteqarneranik kinguneqarpoq. Tamanna præsidentimut allakkatigut aamma nalunaarutigaa. Qisuariarnerlu tamanna paasineqarsinnaalluartoq, Bryndís Haraldsdóttir oqarpoq.

- Aap, paasinarpoq. Taamaappoq, taanna oqarpoq, nangillunilu nunarput Nunat Avannarliit Siunnersuisoqatigiiffianni pingaaruteqarnerarpaa.

Taamaammat taanna vicepræsidentilu kalaallit politikerit Nunat avannarliit qanoq isigineraat paasiniariartorlugu Nuummiipput.

- Tamanna paasisaqarfigerusulluinnarparput. Nunat Avannarliit Siunnersuisoqatigiiffianni susoqartarnera aamma nassuiaatigerusupparput. Reykjavikkimilu ataatsimiinnissamut kalaallit suleqatiginissaat qulakkeerusulluinnarpara, Bryndís Haraldsdóttir oqarpoq.

Nunat Avannarliit Siunnersuisoqatigiiffiat pillugu isumaqatigiissut allanngortikkusukkaa

Nunat Avannarliit Siunnersuisoqatigiiffianni eqimattanik A-nik B-nillu peqarsinnaanngitsoq Múte B. Egedep arlaleriarluni erseqqissaatiginikuuaa.

Taassuma Inatsisartuni ukiakkut ataatsimiinnermi ammaanersiornermi oqalugiaammini aamma tamanna oqaatigaa.

- Nunat avannarliit tikilluaqqujumanngippatigut tamakkiisumillu ikinngutigiinnermik anersaaqarnerput tigusinnaanngippassuk, taava ingerlalluarnissaannik siunissagissaarnissaannillu kissaatissallugit pissusissamisoornerussagunarpoq.

Nunat avannarliit Siunnersuisoqatigiivini nunani avannarlerni nuna namminersortuunera namminerluunniit aquttuunera apeqqutaatinnagu nunanut tamanoortariaqartut, Bryndís Haraldsdóttir oqarpoq.

Tamannalu Nunat Avannarliit Siunnersuisoqatigiiffianni suleqatigiinnissamut isumaqatigiissummut Helsingforsaftalemut allannguinissamut siunnersuutip allanngortikkusuppaa. Siunnersuummi Kalaallit Nunaat, Savalimmiut Ålandilu ilaasortat sinnerisulli inissisimalerniartinneqarput.

Siunnersuut Nunat Avannarliit Siunnersuisoqatigiiffiata Reykjavikkimi oktobarimi ataatsimiinnerani oqaluuserineqarlunilu taasissutigineqassaaq. Taanna akuerineqassaguni Nunat Avannarliit Ministeriisa Siunnersuisoqatigiivinut inaarutaasumik aalajangiisussanut nassiunneqassaaq.

Taamaammat Bryndís Haraldsdóttirip kalaallit politikerit Reykjavikkimi oqallinnermut taasinermullu peqataanissaat neriuutigaa.

Ataatsimiinnermilu Issittumi eqqissisimatitsineq isumannaatsuunerlu pingaarnertut aamma sammineqartussaapput. Præsidentillu Nunat Avannarliit Siunnersuisoqatigiiffiata Kalaallit Nunaata ilaannginnera takujuminaatsippaa.

- Issittoq sammingaatsiartaratsigu kalaallit isumaat oqallinnermi ilaannginnissaat eqqumiitsorujussuussaaq. Eqqarsaatigeriartigumi: Naak nunat avannarliit tamarmik Issittumut ilaagaluartut Kalaallit nunaat tamatsinnit issittumiinnerpaavoq, Bryndís Haraldsdóttir oqarpoq.

Múte B. Egedep oqaloqatiginissaa neriuutigigaa

Bryndís Haraldsdóttirip nunanut allanut naalagaaffinngornissamullu naalakkersuisoq, Vivian Motzfeldt (S), Inatsisartunut siulittaasoq, Mimi Karlsen (IA), Inatsartunut ilaasortaq, Doris J. Jensen Nunat Avannarliit Siunnersuisoqatigiiffiannut ilaasortaasoq ataatsimeeqatiginissaannut isumaqatigiissuteqarfigereerpai.

Bryndís Haraldsdóttirip naalakkersuisut siulittaasuat, Múte B. Egede aamma attaveqarfigaa. Taassumali saaffiginnissut suli uterfiginngikkaa, taassuma paasissutissiissutigaa.

- (Múte B. Egede aaqq.) oqaloqatigerusuppara, aamma sapinngisamik politikererpassuit. Taakku qanoq isiginninnerat paaserusuppara, uagullu tungitsinniit susoqarnera nassuiaatigerusullugulu siumut aqqutissarsiorusuppunga.

Danskit ministeriunerat, Mette Frederiksen (Socialdemokratiet) Sverigep Kalaallit Nunaannik maajimi qaaqqusinnginnera pillugu arlaleriarluni aperineqarnikuuvoq. Taassumalu Kalaallit Nunaata Savalimmiullu nunat avannarliit suleqatigiinneranni inissisimalluarnissaat kissaatigalugu akissutigiuarpaa.

Islandip Nunat Avannarliit Siunnersuisoqatigiiffianni siulittaasuuffik 2025-mi januaarip aallaqqaataanit nangittussaavaa.