Tusagassiorfik: Ålandip nunatta nunat avannarliit siunnersuisoqatigiivinik isornartorsiuinera taperseraa

Naalakkersuisut siulittaasuata Múte B. Egedep nunat avannarliit siunnersuisoqatigiivinik isornartorsiuinera Ålandimi naalakkersuisunit maanna tapersersorneqarpoq. Naalakkersuisut siulittaasuat nunat avannarliit siunnersuisoqatigiivinik sapaatit akunnerata siuliani isornartorsiuivoq.

Kalaallit Nunaat, Savalimmiut Ålandilu ataatsimiinnissamut peqataatsaaliugaasut, Múte B. Egede oqarpoq.

Nunanut allanut, sillimaniarnermut illersornissamullu politikkikkut apeqqutit ataatsimiissutigisussaanerat Savalimmiuni, Ålandimi Kalaallit Nunaannilu qinikkanik ataatsimeeqatiserinninngerminnut Nunat Avannarliit Siunnersuisoqatigiivini siulittaasuuffimmik tigumminnittup Sverigep tunngavilersuutigigaa, Múte B. Egede oqarpoq.

Isornartorsiuinerlu inissimaniittoq Ålandip nunanik avannarlernik suleqateqarnermut ministeriata Annika Hambruddip maanna oqaatigaa. Altinget Arktis taama allaaserisaqarpoq.

- Åland assersuutigalugu nunanut allanut tunngasunut politikkikkut nammineq oqartussaassuseqanngitsoq ilumoorpoq. Sillimaniarnermulli politikki ataatsimut isigalugu maanna sammineqartorujussuuvoq, matumanilu suleqataavugut. Tamannalu pillugu suleqatigiinnerusoqarnissaa taamaammat pingaaruteqarpoq, taanna oqarpoq.

Åland politikkikkut Finlandip ataani pisortatigoortumik inissisimavoq, Finlandip Sverigellu akornanni inissisimalluni.

Ålandili Kalaallit Nunaatut qisuariarnavianngitsoq Annika Hambruddip oqaatigaa, Múte B. Egedellu iliuuserisai immikkut maluginiagassaasutut nalilerlugit paasinarlutilli.

Nunani avannarlerni suleqatigiinnermi avissaartuuttoqarnissaanut maanna piffissaanngitsoq taassuma oqaatigaa, naalagaaffiillu namminersornerullutillu oqartussaqarfiit akornanni ataqatigiittoqarnissaa pisariaqarsoralugu.

Nunani avannarlerni nunat, Kalaallit Nunaat Savalimmiullu taakkununnga ilaallutik, nunat avannarliit siunnersuisoqatigiivisa ataatsimiinnissaannut peqataanissaat kissaatigigini ministeriunerup Mette Frederiksenip erseqqissaatiginikuuaa.