Nunatta Europami ikinnguteqarnini uummarissaqqikkaa
Nunanut allanut naalakkersuisoq, Vivian Motzfeldt (S) piffissami kingullermi Europami illoqarfiit pingaarnersaannut arlalinnut angalavoq. Taassuma Europami politikerit siulittaasui arlallit kaffisoqatigai, assammippai assiliseqatigalugillu.
Taassumalu franskit illoqarfiisa pingaarnersaat, Paris ilaatigut tikeraarpaa, Frankrigillu nunanut allanut ministeriat, Jean-Noël Barrot ataatsimeeqatigalugu.
Vivian Motzfeldt tikeraarnermi kingorna tusagassiuutinut nalunaarummi allappoq:
- Frankrig nunat tamat akornanni naapitsinissanik siunertalinni nunatut siullertut tikeraarparput, maanilu Naalakkersuisut sinnerlugit Frankrigip piffissami ajornarkusoorfiusumi tapersersuineranut qujaniarnerput oqaatigaara. Peqatigisaanillu suleqatigiinnitta ineriartortinnissaanik kissaateqarnitsinnik oqariartuut apuupparput.
Ataatsimiinnerit nunatsinni naalakkersuisut nunat tamalaat akornanni politikkikkut pisoqarfimmi peqataasoq takutitsipput. Tamatuma saniatigut naalakkersuisut nunanut allanut politikkikkut periuseq naleqqussarsimagaat takutikkaa, Ilisimatusarfimmi Nunanut allanut Sillimaniarnermullu Politikkimik suliaqarfimmi Nasiffimmi aqutsisoq, Rasmus Leander isumaqarpoq.
- Nunatta nunanut allanut politikkikkut periusissiaq nutaaq ukioq ataaseq matuma siorna saqqummiuppaa, tassani USA pingaartinneqangaatsiarpoq. Naalakkersuisut Europami iligisimasatoqqani tikeraartaleqqikkaat maanna takuneqarsinnaavoq. Ilisat taakku ukiuni arlalinni pingaannginnerutinneqarsimagaluarput, taanna oqarpoq.
Trumpip nunarput Europamut qaninnerulersikkaa
Illersornissamut ilinniarfimmi lektorip, Marc Jacobsenip Europap nunatta akornanni atassuteqarneq pitsanngoriartulersoq aamma maluginiarpaa.
Taassuma Nunat Avannarliit Ministeriisa Siunnersuisoqatigiivini generalsekretærip, Karen Ellemannip qaammatip siuliani oqaaseqarnerani Kalaallit Nunaat – Trumpip Kalaallit Nunaannik aqutsilernissamik anguniagaqarnera eqqarsaatigalugu – Kalaallit Nunaat – nunat avannarliit suleqatigiinneranni tamakkiisumik ilaasortaalertariaqarneranik kaammattuinera pingaartumik erseqqissaatigaa.
- Trumpillu Præsidentip Illorsuaniinnerani kissaatip tamatuma piviusunngortinnissaa ajornartuusariaqanngilaq, taanna Politikenimut taamani oqarpoq.
Ellemannip oqaaseqarnerata piffissalerneqarnera maluginiagassaavoq. Tassami inatsisitigut qulaajaanermi Kalaallit Nunaat, Savalimmiut Ålandilu tamakkiisumik ilaasortanngoraluarpata qanoq kinguneqarnissaanik naliliisoqannginnerani oqaaseqarpoq.
Generalsekretæri tamatuma saniatigut nunatta Nunat Avannarliit Ministeriisa Siunnersuisoqatigiiffiani inissisimaneranut tunngasumik KNR-imut novembarimi oqaaseqarumanngilaq. Taamani tamanna "naalakkersuisoqarfiit akornanni oqaluuserisassaasoq" tunngavilersuutigaa.
Marc Jacobsenilli novembarimiilli pisoqangaatsiarsimasoq erseqqissaatigaa:
- Allannguutini annertooq tassaavoq Donald Trumpip Kalaallit Nunaannut soqutiginninnera periarfissaanermit siooranartoqarneranik isigineqarsinnaanerusoq. Nunat avannarliit akornanni – immaqa aamma naalakkersuisuni – qaninnerusumik suleqatigiinneq USA-mit tatineqarnerujussuarmut nukittunerusumik inissisimatitsisinnaasutut isigineqarpoq. Tamanna Karen Ellemannimut aalajangiisuunerpaagunarpoq, Marc Jacobsen oqarpoq.
Aalajangiinermi pingaarutilimmik alloriarneq
Kalaallit Nunaat Nunat Avannarliit Siunnersuisoqatigiivini aamma Ministerit Siunnersuisoqatigiiffianni naligisatut akuerineqassappat tamanna kalaallit politikeriinut nunani avannarlerni suleqatigiinnerup ingerlaneranik ukiorpassuarni naammagisimaarinninngissimasunut ajugaanerujussuussaaq.
Ajugaanerlu takussutissaaginnanngitsoq, Illersornissamik ilinniarfimmit, Marc Jacobsen oqarpoq.
- Nunat Avannarliit Siunnersuisoqatigiivi aamma Ministerit Siunnersuisoqatigiivi Kalaallit Nunaata namminersortumik peqataasutut inissisimaffigisinnaasaani nunanut allanut politikkikkut periarfissartaqarput. Nunanut allanut politikkikkut periarfissaqarneruneq namminiilivinnissamut aqqummi alloriarneruvoq pingaaruteqartoq, taanna oqarpoq.
Tamatuma saniatigut Rasmus Leanderip Nasiffimmeersup Nunat Avannarliit Siunnersuisoqatigiiffianni aamma Ministerit Siunnersuisoqatigiiffianni naligiittut ilaasortaaneq nunanut allanut naalakkersuisoqarfimmut kiffaanngissuseqarnerutitsissasoq erseqqissaatigaa. Naalakkersuisoqarfiummi nunatta kunngeqarfiup Issittumi Siunnersuisoqatigiinni siulittaasuuffeqarnerani aqutsisuunissaa qulakkeereerlugulu kalaallimik issittoq pillugu aallartitamik – tassa Kenneth Høeghimik toqqaanissaq qulakkeereerpaa.
