EU Norgelu aalisagartassiissutit isumaqatigiissuteqarfigaat
Illuatungeriit ukioq-manna aalisagartassiissutit pillugit nutaamik tassa isumaqatigiissuteqarput, tamatumalu kingunerilissavaa - qallunaat aalisartuisa Norgep imartaani aalisarsinnaaleqqinnerat.
Aalisarnermik inuussutissarsiuteqartut neriuutigisimagaluarpaat aalisarnermut isumaqatigiissut ukioq-mannamut atuuttoq Norgep EU-llu qaammammi kingullermi isumaqatigiissutigissagaat. Isumaqatigiissut taanna ukiortaamiilli amigaatigineqarpoq - aalisartummi Norgep imartaani aalisartarfinnaaminni aalisarsinnaanngimmata.
Isumaqatigiinniarnerit arlaleriarlutik ajalusoorput - tamannalu aalisartunut millionit koruuninik arlalinnik annaasaqaataavoq, aalisakkerivinnilu sulisorpassuit angerlartiinnarneqartariaqarlutik.
Aalisakkat Norgemit pisut Danmarkimut EU-mullu eqquteqqusaajunnaassasut Danmarkimi Aalisartut Kattuffiata sapaatip-akunnerani kingullermi piumasarigaluarpaa.
Isumaqatigiinniarnerit novembarimi aallartinneqarsimasussaagaluarput, decembarimilu naammassineqarlutik. Taamaalilluni isumaqatigiissut ukiup nikinnerani atuutilerluni.
Isumaqatigiiniarnerit arlaleriarlutik kinguartinneqarput - avaleraasartuut Atlantikup avannaata kangianiittut pisassiissutigineqarnissaannut isumaqatigiinniarnerit EU kommissionep pingaarnerutissimammagit.
Danskit inuussutissalerinermut ministereqarfiat nalunaarpoq, avaleraarsaartuut aalisarneqarnissaannnik EU, Norge Savalimmiullu isumaqatigiissuteqartut. Isumaqatigiissut ukiuni tallimani atuuttussanngorpoq.
Savalimmiormiut aalisariutaat nunanut EU-mut ilaasortaasunut taakkununnga ilanngullugu Danmarkimi umiarsavilinnut taleqqusaajunnarnerat isumaqatigiissuteqarnikkut atorunnaarsinneqarpoq.