Eqqartuussivimmut aningaasat: Ataasiakkaannguit nutaarsiassaq tusaramikku qullilipput

Danskit Folketingiat nunatsinni eqqartuussivinnut ukiunut pingasunut 50 millionit koruuninik immikkoortitsivoq.

Tamannalu nunatsinni eqqartuussiviit peqatigiiffianni ilaasortat nuannaartigaat.

- Nuannaartorujuupput ataasiakkaannguit qullipipput ukiut arlallit sulissutiginikuugatsigu taanna tusarluarnartorujuuvoq pissanganaannarpoq qaquguussanersoq, eqqartuussisut peqatigiiffianni siulittaasoq, Pia Hjort Larsen KNR-imut oqarpoq.

Aningaasat eqqartuussivinnut ulapiffiunerpaasunut eqqartuussisunik marlunnik kiisalu eqqartuussivimmi allatsinik marlunnik ilinniartitsinermut atorfinitsitsinermullu atorneqassapput.

Saniatigullu oqalutsinik marlunnik atorfinitsitsinermut aamma atorneqassallutik.

- Neriuppunga innuttaasut eqqartuussivimmi suliassaataat sukkanermik suliarisinnaasassagigut, Pia Hjort Larsen oqarpoq.

Eqqartuussisut uippakajaartut

Pia Hjort Larsen nunatsinni eqqartuussisut aqqaneq-marluk ilagaat. Taassuma suliassaqangaatsiarnera imminut suleqatiminullu nanertuusartoq oqaatigaa.

- Ulapittaqaagut, ikippallaaratta, taava angummanniarnerput taanna ilungersunartarami innuttaasunut sunniuteqartassaaq pinngitsoorani utaqqerujuttarnerit assigisaallu.

Siulittaasup oqarnera naapertorlugu eqqartuussisut arlallit uippakajaarnermik eqqugaaqqapput, namminerlu aamma ilaalluni. Taanna sapaatini akunnerni pingasuni sulinngiffeqaqqammerpoq.

- Stresserlunga sygemeldeqarnikuuvunga ataasinngormat suliartoqqippunga, Pia Hjort Larsen oqarpoq, nangillunilu:

Suli piareersimavinnginnama uatsinniit suligallarpunga.

Eqqartuussisulli akornanni uippakajaarnermik eqqugaaneq suliassarpassuarnik artorsinneqarnermillu kisimi pissuteqanngilaq.

- Inuiaqatigiit ikittunnguuneri, suliassat amerlavallaarneri massakkut pinerluttuliornermi suliat sakkortusingaluittuinnaramik, pinerluttuliorneq nunatsinni sakkortoorujuuvoq nutaarsissaniittoqalaartuaannarpoq, arlaannik pinerluttulerinermik tunngasunik taakku aamma peqqutaaqataasorujussuupput, Pia Hjort Larsen oqarpoq.

Digitalinngorsaaneq

Suleqatissallu arlalinngornissaata saniatigut digitalinngorsaaneq atorluarneqalerpat suleriusissaq oqinnerulissaaq.

Eqqartuussivikkoortumik nalunaarsuineq. Inatsisitigut paasissutissat soorlu inatsisitigut allagaatit atulersinneqaqqaarlutik atuuttussanngortinneqarsinnaapput. Paasissutissat nalunaarsorneqartut tamanit pissarsiarineqarsinnaapput.

- Digitalimillu politiit tunniussisinnaanerat iluamik ingerlalerpat aamma suliamik isumaginnerup sivisussusaa sivikinnerulissaaq.

- Pappiliarsornerujussuaq atorunnaarlutigu ullutsinnut malinnaanerulerutta assut iluassaaq, Pia Hjort Larsen oqarpoq.

Danskit inatsiseqarnermut ministeriata Peter Hummelgaardip Folketiginimi partiit allat tamarmik peqatigalugit naalagaaffeqatigiinni tamarmi eqqartuussiviit aningaasaqarnerat pillugu nutaamik isumaqatigiissuteqarpoq.

Nunatsinni Savalimmiunilu suliat amerliartuinnarnerannut, suliamik isumaginninnerup sivisussusaannut qarasaasiatigullu tunngatillugu kinguleruttoornermut iluaqutaasumik eqqartuussiviit pitsanngorsarnissaannik tassani isumaqatigiipput.

- Isumaqatigiissut aqqutigalugu ukiunut sisamanut aggersunut suliniuteqarnissamut pisussaaffilerpugut, tassani suliamik isumaginnittarfiup sivikinnerulersinneqarnissaa pingaartut sammineqarpoq. Aamma isumaqatigiisutt Kalaallit Nunaanni Savalimmiunilu eqqartuussiviit pitsanngorsarnissaannut suliniuteqarfiummat tamanna nuannaarutigaara, Peter Hummelgaard tusagassiuutinut nalunaarummi oqarpoq.