Eqqartuussusisut suaaruteqartut: Akissarsianut nutaamik isumaqatigiissuteqarnissarput pisariaqartilluinnarparput

Nunatsinni eqqartuussisut nunatsinni tjenestemandinut naalagaaffimmut akissarsiat sulinermilu atugassat pillugit isumaqatigiissuteqartoqarnissaanut ukiuni arlalinni utaqqisunut ilanngupput.

Allattoq Helle Nørrelund Sørensen

apriilip 17-at 2023 11:45

Pinerluttuliornermi suliat peqqarniilligaluttuinnartut, eqqartuunneqarsimasut naapittarneri suliamillu suliarinninnissaannut piffissaasuaneq.

Nunatsinni eqqartuussisut nalaattagaasa ilagiinnarpaat. Tamakkulu akissarsiat qaffasinnerunissaannik sulinermilu atugassarititaasunik pitsaanerunissaannik kinguneqartariaqartut, Eqqartuussisut peqatigiiffiat, Eqqartuussisoq, isumaqarpoq.

Kalaallit folketingimut ilaasortaatitaanut allakkami taama allassimavoq.

Eqqartuussisut nunatsinni naalagaaffiup tjenestemandiinut akissarsiat pillugit nutaamik isumaqatigiinniarnerit siornali unittoorsimanerat isumatsassimaarutigaat. Eqqartuussisullu akissarsiaannut tunngatillugu taakku isumaqatigiissutaat ukiuni 13-ini nutartersimanngillat.

- Ilaatigut puiorneqartarluta peqatigiiffitsinnit misigisimavugut, Eqqartuussisumi siulittaasoq, Pia Hjort Andersen, politikerinut allakkamini oqarpoq.

Peqatigiiffik: Sulinermi atugassarititaasut Danmarkimi eqqartuussisunit sakkortunerusut

Eqqartuussisut nunatsinni naalagaaffiup tjenestemandiisa ataanniipput. Nunatsinni naalagaaffiup tjenestemandii tjenestemandit Danmarkimi sulisut isumaqatigiissutaanniinnatik danskit naalagaaffianut allamik ullumikkut isumaqatigiissuteqarput.

Eqqartuussisullu akissarsiarinnerunissaannut sulinermilu atugassarititaasut pitsaanerunissaannut pissutissaqarluartoq, eqqartuussisut peqatigiiffiat isumaqarpoq. Nunatsinni eqqartuussisunut atugassarititaasut Danmarkimi eqqartuussisutut suliffimmit assigiinngitsorpassuartigut sakkortunerungaatsiarput.

EQQARTUUSSISUT AKISSARSIAQARNERMI SULINERMILU ATUGASSARITITAAT

Eqqartuussisunut isumaqatigiissut maanna atuuttoq 2010-meersuuvoq. Taanna matuma kingorna nutarterneqarsimanngilaq.

Nunatsinni eqqartuussisup akissarsiaanut killissaritinneqartoq 36-miippoq. Tunngaviusumik akissarsiat tapiissutit ilanngullugit 32.000 koruunit missaanniipput. Akissarsiassat qaammatit tamaasa akileraannginnermi 43.000 koruunit missaanniippoq.

Danmarkimi tjenestemandit isumaqatigiissummi allamiipput. Danmarkimi illoqarfimmi eqqartuussisunut akissarsianut killissaritinneqartoq 37-miippoq, tunngaviusumillu akissarsiat tapit ilanngullugit qaammatit tamaasa akileraannginnermi 49.000 koruuniullutik.

Nunatsinni naalagaaffiup tjenestemandiinut nutaamik isumaqatigiinniarnerit 2020-mi upernaakkut aallartinneqarput, isumaqatigiinniarnerilli 2022-mili unittooqqalerput.

Paasissutissarsiffik: Danmarkimi Sulisoqarnermut Piginnaasaqarnermullu aqutsisoqarfiup akissarsiaqartitsinermut allattorsimaffia 2022-mi apriilip aallaqqaataaneersoq, Eqqartuussisut peqatigiiffiat Eqqartuussisoq, naalagaaffiup Kalaallit Nunaanni eqqartuussisuinut isumaqatigiissutit.

Allisiguk

Siullertut nunatsinni eqqartuussisunngortinneqarsinnaasut aqqaneq-marluinnaapput, taakkulu suliat inatsisinut tamanut tunngasut suliarisartussaavaat – Danmarkimili eqqartuussisut amerlanertigut ataasiinnarmik ikittuinnarnilluunniit immikkut sammisaqartarput.

Aamma atuarukNaalakkersuisut: Kalaallit Nunaanni pineqaatissinneqarsimasunut inissiisarfinni nakkutilliisut pillugit isumaqatigiinniarnerit eqqaamallugit

- Maani nunatsinni eqqartuussisut suliat assigiinngitsut tamarmik suliarisarpagut, inatsisillu nutaat malillugit suliaqarnissarput suliallu tamarmik sammilluinnarlugit suliarisinnaassagivut naatsorsuutigineqarluni, siulittaasoq, Pia Hjort Andersen allakkami oqarpoq.

Danmarkimi eqqartuussisut inatsisilerinermik kandidatitut ilinniagaqaqqaarlutik illoqarfiup eqqartuussiviani eqqartuussisutut ukiuni pingasuni ilikkamik aallartitsisinnaapput. Nunatsinni eqqartuussisunngorniaraanni eqqartuussisut ukiuni marlunni ilinniagaqarnissaq pisariaqarpoq.

Ilinniakkalli taakku marluk assigiinngissusaat nunatsinni eqqartuussisup Danmarkimilu illoqarfiup eqqartuussisuata akissarsiaasa assiginngissutaannik nassuiaanissamut naammanngitsut, Pia Hjort Andersen isumaqarpoq.

- Uagut ilinniarfipput inatsisilerinerujussuuvoq. Sakkortuvoq, suliassaqarfiillu assigiinngitsut tamarmik suliaqarfigisarlugillu inatsisinik ullut tamaasa suliaqartarpugut, nikanaratalu.

Tamatuma saniatigut nunatsinni eqqartuussisorpassuit suliami eqqartuusseqataaffigisimasaminnit aporaaffigineqarneq aarlerinerlu nalaattarpaat.

- Inuiaqatigiinni ikittunnguulluta imminut ilisarisimavugut. Taamaammat assersuutigalugu ilaquttagut illoqarfimmeeqatigitillugit inummik eqqartuussimasatsinnik imaluunniit eqqartuussivimmit angajoqqaatut oqartussaaffeqarunnaartissimasatsinnik naapitseratarsinnaasarpugut, Pia Hjort Andersen oqarpoq.

NUNATSINNI TJENESTEMANDIT

Naalagaaffimmi tjenestemanditut nunatsinni sulisut tjenestemandeqarneq tunngavigalugu atorfeqarput.

Soorlu pinerluuteqarsimasunut inissiisarfinni nakkutilliisut, politiit, eqqartuussivinni atorfillit qaffasissumillu ilinniagallit tjenestemandiupput.

Naalagaaffimmi tjenestemanditut nunatsinni ukioq kaajallallugu piffissarlu tamakkerlugu suliffiit 250-it missaanniipput, Danmarkimilu 183.000-t missaanniillutik.

Nunatsinni tjenestemandit nunatsinni tjenestemandinut inatsit tunngavigalugu atorfeqarput, tjenestemandillu suliumajunnaaqqusaanngitsut inatsimmi tassani allaqqavoq. Kisianni soraarsitaanissamut illersugaalluarlutillu pisortat suliffeqarfiutaanni allani atorfilininngarnit qaffasinnerusumik soraarnerussutisiaqarput.

Tusarfik: Bekendtgørelse af lov om statens tjenestemænd i Grønland, 2015

Allisiguk

Eqqartuussisullu sulinngiffeqarnissaminnut immikkut katersinatik nunatsinni angalangaatsiartarput.

Taamaammat akissaateqarfimmi qaffaasoqarnissaa, sulinermi angalanerup kingunerani taarsiutitut sulinngiffeqartoqarsinnaalernissaa, ukiullu aappaata tamaasa sulinngiffeqarnermi angalanissamut akiliutitittarnerup ukiut tamaasaalernissaa kissaatigaa.

Tamatuma saniatigut Nuummi aamma Eqqartuussisoqarfik Qaasuitsumi eqqartuussisutut atuuffiit ikippallaartut peqatigiiffik isumaqarpoq.

Isumaqatigiinniarnerit sivisussusaat ilisimaneqanngitsoq

Eqqartuussisulli isumatsassimangaartuni kisimiinngillat.

Taakkumi naalagaaffiup nunatsinni tjenestemandiisa sinnerinut, 2020-mili akissarsianut atatillugu nutaamik isumaqatigiissuteqartoqarnissaanut utaqqisunut ilaapput.

Pingaartumik pinerluuteqarsimasunut inissiisarfinni nakkutilliisut politiillu ukkatarineqarnikuupput, kisianni piffissaq tamakkerlugu atuuffiit 250-it missaanniittut pineqarput.

Aamma atuarukPolitiit, eqqartuussisut pineqaatissinneqarsimasunullu inissiisarfinni sulisut aningaasarsiaat pillugit isumaqatigiinniarnerit unittooqqasut

Nunatsinni naalagaaffiup tjenestemandiinut nutaamik isumaqatigiissuteqarniarnerit unittooqqasut Folketingimi Akissarsiat pillugit isumalioqatigiissitamut siorna aasakkulli ingerlanneqarnikuuvoq.

Matumani politikerit sulinermilu peqatigiiffinnit aallartitat isumaqatigiinniarnerit qanoq inerneqarnissaannut isumaqarnerminnik naliliinermik Danmarkimi akileraartarnermut ministereqarfimmut tunniussaqassapput.

Danmarkimi Aningaasaqarnermut ministereqarfiup ataani Sulisoqarnermut Piginnaasaqarnermullu aqutsisoqarfik Akissarsianut isumalioqatigiissitamut aggersaasussaavoq. Aqutsisoqarfiulli oqarnera naapertorlugu oqaluuserinninnissamut suli ulluliisoqanngilaq.

Tamanna nunatsinni tjenestemandit sinnerlugit naalagaaffimmut isumaqatigiinniartumit, isumaqatigiinniaqatigiiffimmit SKAF-imit uppernarsarneqarpoq.

Nutaarsiassami kukkunermik nassaarsimaguit uunga allaffigineqarsinnaavugut.