50 millionit koruunit nunatsinni eqqartuussivinnut qulakkeerneqartut
50 millionit koruunit nunatsinni eqqartuussivinnut ukiunut sisamanut aggersunut immikkoortinneqarput.
Inuit Ataqatigiinneersoq Folketingimut ilaasortaq, tusagassiuutinut nalunaarummi allappoq.
Isumaqatiginninniarnerit naammasseqqammerluinnarput, IA-miillu Aaja Chemnitz Larsen Folketingimi ilaasortaasup oqarnera naapertorlugu eqqartuussiviit digitalimik eqqartuussivikkoortumik nalunaarsuisoqartalernissaa eqqartuussisullu amerlanerulernissaat qilanaarutigisinnaavaat.
- Kalaallit Nunaanni eqqartuussivinnut 50 mio. kr.-it qulakkeernissai iluatsipparput, taakkulu qaangerniagassarpassuarnik nungusaataasinnaanissaat neriuutigaara, taanna tusagassiuutinut nalunaarummi allappoq.
- Kalaallit Nunaanni eqqartuussiviit ullutsinnut naleqquttut qaffasissumillu pitsaassuseqarnissaat tunngavigalugit isumaqatiginninniariartorpugut. Taamaammat nuannaarutigaara ilaatigut IT-mik atortorissaarutinut pitsaanerusunut aningaasat qulakkeerneqarmata, tamatumani ilanngullugit digitalimik eqqartuussivikkoortumik nalunaarsuineq suliallu suliarineqartarnerisa maanna sivisuallaarujussuartut sivikinnerulernissaat.
Oqalutsit marluk eqqartuussisullu marluk
Eqqartuussiviit danskit akisussaaffigaat, taamaammat Folketingimi isumaqatiginninniarnerit kalaallimit peqataaffigineqarput.
- Isumaqatigiinniarnernut atatillugu eqqartuussiviit sinniisaannik oqaloqateqarpunga Inatsisillu Atuutsinneqarnerannut Naalakkersuisumik qanimut suleqateqarlunga. Ataatsimoorluta Justitsministerimut tatisivugut Kalaallit Nunaannut iluaqutaasumik isumaqatigiissuteqarnissaq anguniarlugu, Aaja Chemnitz Larsen oqarpoq.
50 millionit koruunit 2024-2027-imut immikkoortinneqarput.
Aningaasat eqqartuussivinnut ulapiffiunerpaasunut eqqartuussisunik marlunnik kiisalu eqqartuussivimmi allatsinik marlunnik ilinniartitsinermut atorfinitsitsinermullu atorneqassapput
Aningaasat oqalutsinik marlunnik saniatigut atorfinitsitsinissamut aamma atorneqassapput.
