Eqqakkat atorluarneqartut
![](/sites/default/files/styles/image_934x467/public/article_images/metal-web.jpg?itok=0GKWeiVb)
Kommuneqarfik Sermersuumi eqqakkanik isumaginnittoqarfiup aggustip qaammataa ilanngullugu eqqakkat ikuallanneqartussat aamma Nuummi eqqakkanik tigooraaviup immikkoortortaani assigiinngitsuni suliarineqartussat 12.950 tonsit tigusimavai. Taakkunannga 7 procentit atoqqinneqartussatut nalilerneqarput - tassa eqqakkat 900 tonsit missaat atoqqinneqarsinnaapput.
- Eqqakkat atoqqinneqarsinnaasut kilisaatininngaaneersinnaapput aalisartulluunniit qassutaanniit. Aamma saviminiusinnaavoq saffiugassarluunniit, taakkuupput pingaarnertut tigusartakkagut. Sikkiliusinnaapput pisoqqat, qillertuusat, qullikut pisoqqat saffiugassamik qulliliat, Kommuneqarfik Sermersuumi ingerlatsinermut avatangiisinullu siunnersorti Mia Nielsen oqarpoq.
Kikiaat qinnerillu nutaat
Eqqakkanik tigooraavimmit saviminikut pissarsiarineqarsimasut, containerersuarnut poortuunneqartarput Danmarkillu tigooraavianut nassiunneqarlutik.
- Savimerngit Danmarkimut tikiunneqareeraangata, taava minguinnerit immikkoortinneqartarput saffiugassiorfimmullu nassiunneqartarput, taamaalillutik nutaatut kikialiarineqarlutillu qinniliarineqartarput, Mia Nielsen oqarpoq.
Ukioq manna Kommuneqarfik Sermersuup saviminikut 891 tonsit Danmarkimut nassiussaasa ilaannit 82 procentii saviminissatut saffiugassatulluunniit toqqaannartumik atoqqinneqarput, 5 procentit ikuallanneqartussanngortut. Kingulliit 13 procentit toqqorsivinnut iliganeqarallarput, atoqqinneqarsinnaaffissaannik nassaartoqarnissaa tikillugu. Sinnikunik ikuallaaneq toqqorsivinniititsinerlu Danmarkimi pisarpoq.
- Avatangiisinut suut iluaqutaassanersut pissutsillu missiliutigineqassanersut apeqqutaajuaannarpoq. Savimerngit nungutinnissaat sivisoorujussuusarpoq assersuutigalugu cykelip nungutinniarnera ukiunik 100-init amerlanerusuni pisarpoq taamaammat maani pinngortitatsinniitsissagutsigu sivisoorujussuussaaq.
Kommunit nittartagaanni eqqagassaativit isumaginissai pillugit paasisaqarnerusinnaavutit.