Elin Nilsson nersornaaserneqartoq
Elin Nilsson ullumi ataasinngornermi oktobarip ulluisa aqqaneq-aappaani 80-nik ukioqalerpoq. Tamanna pillugu Hans Lyngep kajumissaataanik 10.000 koruuninik tunineqarpoq.
Elin Nilsson qasusuilluni kalaallit inuusuttortaannut aamma kalaallit isiginnaartitsisarfiata siullerpaap aallartinneqarnissaanut suliniuteqarnera pillugu Hans Lyngep aningaasaateqarfianit nersorniarneqarpoq.
Elin Nilsson efterskolemi ilinniartitsisuunermini kalaallit Danmarkimut nuussimasut illussaannik kommunip ingerlataanik peqalernissamik suliniuteqartunut ilaavoq.
Elin Nilsson Holstebromi borgmesterimit tapersersorneqarluni, kalaallit inuusuttut ornittagassaannik Holstebromi 1970-imi pilersitseqataavoq.
Taamani Grønlandsministeriap pisortatigoortumik isumaa tassaasimavoq kalaallit danskinut akuliutsinneqassasut illunullu aalajangersimasunut katersuunneqassanngitsut.
Elin Nilsson uinilu Reidar Nielsson suleqatigiillutik taamani kalaallit isiginnaartitsinermut ilinniarfeqalernissaannik eqqarsaat ineriartortippaat tamatumalu kingorna isiginnaartitsisarfik Tuukkaq Teater Fjalringemiittoq pivisunngortinneqarluni.
Tamatuma kingorna Elin Nilsson kulturikkut illu Tuskær center pilersippaa, taanna Tuukkaq Teaterip eqqaaniippoq.
Elin Nilssonip Reidarillu suliaat Hans Lyngep nuannaarluni malinnaaffigai. Hans Lyngep toqunerata kingorna saqqummersitsineq kingumut qiviarneq, "Isi Isuma - Isit Eqqarsaallu" Elin Nilssonip suliniuteqarneratigut 1990-imi saqqummersinneqarpoq, kingornalu Danmarkimi sumiiffinni amerlasuuni saqqummersinneqarluni, aningaasaateqarfik Hans Lynge Fonden tusagassiorfinnut nalunaaruteqarluni taama allappoq.
Hans Lyngep kajumissaatitut aningaasaateqarfianut qinnuteqartoqarsinnaanngilaq, siulersuisulli aalajangigaannik agguaassisoqartarluni.
