Dronning Magrethe januaarip 14-iani tunuarluni kunngissaq Frederik kunnginngorpat, illersugarpassuatik aamma taamaatissavaat.

Danmarkimi kunngikkormiut tusagassiutinut taama nalunaarput.

Tassalu dronning Magrethep kunngissallu Frederiup peqatigiiffiit suliffeqarfiillu nunatsinnut attuumassutillit maannamut illersuisuuffigisatik aamma taamaatissavaat.

Peqatigiiffik Kalaallit Merartaat kalaallit meerartaasa toqqissisimasumik inuuneqarnissaannik suliniuteqartuusoq illersorunnaagassaannut ilaavoq. Dronning Magrethemik illersorteqarnertik pingaarteqigitsik, peqatigiiffiup Kalaallit Meerartaata pisortaa Puk Draiby oqarpoq.

- Dronningip uagutsinnut illersuisuunermigut tapersersuinera qujanangaarmat nallersuunneqarsinnaanngingajapporluunniit. Suliniutitsinnut illersuisuunera peqatigiiffitsinnut, suleqatitsinnut, aningaasaliisartutsinnut tunisisartutsinnullu isumalerujussuuvoq, taanna oqarpoq.

Dronning Magrethe Kalaallit Københavnimi Illuutaannut piffissaq dronninngiuffigisami tamangajalluinnaani aamma illersuisuuvoq. Taannami illumik taassuminnga ukiut 50-it matuma siorna, tassa 1974-imi atoqqaartitseqataasunut ilaavoq. Dronning Magrethemillu illersorteqarnertik  nuannaarutigeqigitsik, Kalaallit Københavnimi Illuutaata pisortaa Leise Johnsen oqarpoq.

- Danmarkimi kunngikkormiunit soqutigineqarneq droninngianillu atassuteqarluarneq iluaqutigeqaarput. Tamanna Kalaallit Illuutaata iluaqutigeqigaa qularnanngilaq.

Aamma kunngissap Frederiup illersuuffigisani kunnginngoruni taamaatissavai. Danmarkimi peqatigiiffik Danmarkip nunattalu atassuteqaqatigiilluarnissaannik suliaqarfiusoq, Det Grønlandske Selskab, taassuma illersugaanut ilaavoq.

- Kunngikkormiumik illersorteqarnerput suliniuteqarluarnitsinnik ersersitsisuulluinnarmat, Danmarkimi Kalaallit Nunaannilu ilaasortatta tulluusimaarutigisaqaat. Kunngissarpummi nunat marluk taakku naalagaaffeqatigiiusut ataqatigiissuteqarnerannut akunnermiliuttuuvoq, Det Grønlandske Selskabip siulittaasua Johnny Fredericia oqarpoq.

- Atuagassiavut atuartarai atuakkanillu saqqumersitsigaangatta soqutiginnittartoq nalunngilarput. Taamaammat suliatsinnik soqutiginneqisoq malugisarparput, taanna oqarpoq.

Allamik illersortitaarnissartik neriuutigigaat

Illersuuffigisaasa ilaat illersuisuuffiginnassaneritik qaammatit tulliuttut ingerlaneranni isummerfigiumaaritsik, kunngikkormiut ilanngullugu nalunaarutigaat.

Peqatigiiffik Kalaallit Meerartaat Danmarkimilu peqatigiiffik Det Grønlandske Selskab kunngikkormiuneersumik illersorteqaannarnissartik aamma neriuutigaat.

Suliattami qanoq pingaartiginerannik ersitsisuulluinnartuummata kunngikkormiuneersumik illersorteqaannarnissartik neriuutigigitsik, Det Grønlandske Selskabip siulittaasua Johnny Fredericia oqarpoq.

- Kunngikkormiuneersumik illersorteqaannarnissarput sulinitsinnut pingaaruteqarpoq. Taamaaliussasut neriuppugut, piviusunngorpallu tulluutissaagut. Aaqqissuussisarnitsinnummi aningaasaateqarfinnullu qinnuteqartarnitsinnut pingaaruteqarpoq.

Pissutsit allanngortussanngornerannut piareersimagaluarlutik assinganik neriuuteqarlutik, Kalaallit Københavnimi Illuutaata pisortaa Leise Johnsen oqarpoq.

- Kunngikkormiuneersumik allamik illersorteqalissasugut neriuutigaarput, alutornaannaranimi aamma soqutiginnilersitsillunilu atassuteqartitsisarmat. Taamaakkaluartoq pissutsit allanngortussanngornerannut piareersimavugut, allanimmi ilaannikkut aamma pisoqartarmat.

Ukiortaami naggammik ilasseqatigiissitsisoq

Peqatigiiffiit suliffeqarfiillu kunngikkormiuneersumik illersortillit dronningip ukiortaami ilasseqatigiisitsinerani peqataasarnerat ileqquuvoq.

Taamaammat Johnny Fredericia Det Grønlandske Selskabimeersoq dronningip Christiansborg Slotimi ukiortaami sisamanngormat naggammik ilasseqatigiisitsimmat aamma peqataavoq.

- Alutornarpoq. Peqataasugut tamatta dronningip naalagaaffimmi ataqatigiissitsilluarneranik qutsavigissallugu tulluartuusorerpasipparput. Taamaammat sivisulaaraluartoq qiimarrateqaagut, taanna oqarpoq. 

Kalaallit Københavnimi Illuutaannersoq, Leine Johnsen, dronningimut qujassuteqartunut aamma ilaavoq.

- Dronning Magrethe Danmarkip Kalaallit Nunaatalu atassuteqaqatigiinnerannut sunniuteqaqaaq. Tamannalu angajulliliaminut ingerlateqqippaa. Kunngissaq Frederik Kalaallit Nunaannut aamma asanninneqaqisoq nalunanngilaq, taamaammat dronningip tamatuminnga angajulliliaminut ingerlatitseqqiisimanera nuannerpoq.