Dronning Margrethep sapaatiummat ukiortaamut oqalugiarnermini januaarip 14-iani arfininngornermi tunuassalluni, atorfillu Kunngissaq Frederimmut ingerlateqqissallugu oqaatigaa.

Danskit politikerii dronningimut qujassuteqarniartut tulleriiaaginnavipput. Naalakkersuisut siulittaasuat, Múte B. Egede ukiortaami ippassaq oqalugiarmat dronningip tunuarnissaa ataasinnguamilluunniit eqqaaneqanngilaq. Aaja Chemnitzili (IA) qujassuteqarniartunut ilannguppoq:

- Dronningip ukiorpassuarni kusanartumik suliaqarneranut qujarusuppunga, taanna KNR-imut allakkatigut akissuteqarpoq.

Aaja Chemnitz Larsen (IA) Folketingimut ilaasortaavoq, taassumalu dronningi arlaleriarluni naapissimavaa.

- Arlaleriarlunga oqaloqatiginikuuara. Ataasiarlunga ilaquttama Arsummi angerlarsimaffiat pillugu oqaloqatigaara. Arsuk sumiinnersoq nassuiaatiginiarlugu inussiarnisaarluni aalajangersimasumilli sumiinnersoq ilisimalluarlugu oqaatigaa, Aaja Chemnitz oqarpoq.

- Tamanna nunatsinnut allaat nujagaqarfiusunik minnerusunik ilisimasaqarneranik takutitsisoq isumaqarpunga. Inuuvoq ilisimannilluartoq, tikeraakkanilu ataqqiniarlugit ilisimasaqalertarpoq.

Trumpip nunarput pisiariniarmagu

Nunatta nunarsuarmit tamarmit ukkatarineqarnera Aaja Chemnitzip eqqaamasaani ilaavoq.

- Præsidentiusimasup Trumpip USA-p nunatsinnik piserusunneranik oqaaseqarnera immikkut eqqaamaniarpara. Ataqqinartorsuup nunatsinnit, Savalimmiunit Danmarkimiillu inuit qitiusut Fredensborgimi Naalagaaffeqatigiinneersunit Fredensborgimi tusarnaartitsinissamut qaaqquai. Tamanna Kunngeqarfimmi kulturikkut assigiinngisitaartunik taamatullu Naalagaaffeqatigiinni tamarmi assigiinngitsoqarneranik ataqqinnittoqartoq nunanut allanut takussutissiivoq. Taamaalillunilu USA-p tunuarternissaanut toqqaannartumik takussutissiilluni.

Frederik Marylu sinniisuulluassasut

Kunngissaq Frederik januaarip 14-iani kunnginngoruni kong Frederik 10.-mik taaguuteqalissaaq. Aaja Chemnitzillu piffissaq aggersoq qilanaaralugu oqaatigaa.

- Dronning Margrethe taassumalu sulinera assorsuaq ataqqiuaannarsimavakka. Maqaasisaassaaq. Kunnginngortussalli nunatsinnut qaneqisumik atanera tamatta aamma ilisimavarput, taannalu Kronprinsesse Mary peqatigalugu naalagaaffeqatigiinnermut ineriartortuartumut tatigisaallutik sinniisuulluassapput.

- Kunngissap nulia Mary amerlasooriarlunga ilaatigut Meeqqat Illersuisuatut naapinnikuuara, taassumalu pimoorissineranut nunatsinnillu ilisimanninneranut pitsaasuinnarnik oqaasissaqarpunga. Piffissaq ornigarput soqutiginartorujussuuvoq.

Savalimmiormiut lagmandiata, Aksel V. Johannesenip ukiortaamut oqalugiaammini dronningi pillugu aamma oqaaseqanngilaq.

Inatsisartulli siulittaasuat Mimi Karlsen (IA) KNR-imit apersorneqarami oqaaseqarpoq:

- Soorunami tupaallappunga ataqqinartorsuaq tunuarniarmat, kisiannilu aamma eqqarsaatigillualerlugu aamma paasilluarsinnaavara taama ukioqarluni, ukiorpassuit suliuareerluni taamatut tunuarniaranera, paasinarpoq aamma, taanna oqarpoq.