Dronning Margrethe ukiuni 52-ini naalagaaffimmi siuttooreerluni dronningioreerlunilu qanittukkut tunuartussanngorpoq.

Dronningip ukiortaamut atatillugu oqalugiaammini ippassaq oqaatigaa, januaarip 14-ani tunuassalluni, atorfiilu kunngissaq Frederimmut tunniutissallugu.

Nalunaarutaa tupaallaataavoq. Taakkununnga ilaavoq inatsisartut siulittaasuat Mimi Karlsen (IA):

- Soorunami tupaallappunga ataqqinartorsuaq tunuarniarmat, kisiannilu aama eqqarsaatigillualerlugu aamma paasilluarsinnaavara taama ukioqarluni, ukiorpassuit suliuareerluni taamatut tunuarniaranera, paasinarpoq aamma.

Dronning Margrethe qiterminik siorna suliariterujussuareerluni eqqarsaatigilersimavaa kinguaariit tulliit kunngeqarfimmi siuttuulernissaat piffissanngunnginnersoq.

Mimi Karlsenip ataqqinartorsuaq arlaleriarluni naapissimavaa:

- Ataqqinartorsuaq Dronning Margrethe eqqaamavara maani tikeraaraangami inuppalaassusia, soqutiginninneralu. Ataqqinartorsuugaluarlunilu taamaattoq tikeraarnermigut Nunatsinnut takutittarpaa soqutiginninili aamma inuppalaarnini. Inuit kikkulluunniit naapissinnaallugit periarfissaqaraangami periarfissarsiuuttarlugu.

Inatsisartunut siulittaasup Dronning Margrethe 2021-mi nunatsinniimmat kingullermik naapippaa.

- Kingullermik Dronning Margrethe naapippara maani nunatsinni kingullermik tikeraarmat. Pisuni assigiinngitsuni ilagalugu aammalu unnukkut nerersuarnermi aamma issiaqatigalugu.

Kalaallit Nunaannut attaveqarluartoq

Dronning Margrethep nunatsinnut attaveqarnera qanoq illit isigaajuk?

- Dronning Margrethep attaveqarnera kusanartutut isigivara. Aamma nunarput pingaartillugu takutitsiuartarnera pingaartorujussuartut isigaara. Inuiattut inissisimanera dronningitut pingaartorsiutigiuartarparput, taannalu aamma puigornagu Kalaallit Nunaanni innuttaasugut puigornata aamma qanimut ornilluta pisarnera.

Dronning Margrethep taama innera nunatta Danmarkillu akornanni attaveqatigiinnermut qanoq sunniuteqarsimava?

- Nunatta Danmarkillu attaveqatigiinneranni dronningip inissisimanera aamma tikeraartarnera innuttaasunullu attaveqarnera pingaarutilerusussuuvoq.

- Dronningi maanga nunatsinnut tikeraaraangami attaveqatigiinnerput nukittorsartarpaa aammali nunatsinni aamma uagut inuiaat ataatsimoortilluta aamma nukittorsartarmatigut taanaartaa sunniuteqartorujussuuvoq, Mimi Karlsen oqarpoq.

Dronningitut atuussimanera siunissami qanoq eqqaasarumaarpiuk?

- Ataqqinartorsuup dronningip siunissami eqqaasarnera tassa imaassaaq: Nunatsinnik pingartitsisuusoq, soqutigisaminik aamma nalinnaalluartoq, nunatsinni pisunik malinnaasoq, inuit atugarisaannik assigiinngitsunik aamma malinnaalluarlunilu soqutiginnillunilu paasiniaasarnera oqaloqatiginnittarnera puigussanngilakka.

- Nunatsinnut sunniuteqarnera pingaarutilik puigoruminaappoq, ersialaarpoq aamma isumaqarpunga nunarput avammut nittarsaalluartaraa.

Eqqaasaqassaguit nammineq naapinnerani suna oqaloqatigiissutigisinerlugu eqqaasaqarsinnaavit?

- Nunatsinniinnermini assigiinngitsut eqqartorusuttarpai. Siullermik naapikkakku meeqqat atugaasa qanoq pitsanngortikkiartornera maluginiarsimallugu oqaaseqarnikuuvoq, assut taanna soqutigalugu malinnaaffigisimavaa.

- Assigiinngitsutigut meeqqanut suliniutinik suliaqarnitsinni malinnaalluarsimalluni taassumalu saniatigut oqaluttuarisaanermut tunngasunik pingaartitaqarpoq. Aamma puigornavianngilarput nunatsinni pingaarutilinik pisoqartillugu dronningi ilaasarmat – namminersornerulernitsinni – tamakkunani pisuni tamatigut peqatigaluta ornittarmatigut, Mimi Karlsen oqarpoq.