Dronningi kinguaattooreerluni Savalimmiunut tikittoq

Dronning Margrethe Savalimmiunut timmisartumik ullaap tungaani nalunaaqutaq aqqaninngortoq tikippoq. Dronningi ippassaq Savalimmiunukartussaagaluarpoq, silarlunnerali pissutaalluni ullumimut sisamanngornermut kinguartinneqarluni.

Dronningip Savalimmiunut ulluni sisamani tikeraarnissaanut pilersaarutit tamanna pillugu allannguuteqarput.

Dronningi Thorshavnimi pisortatigoortumik ullaap tungaani tikilluaqquneqartussaagaluarpoq, tamannali ualikkut nalunaaqutaq ataatsimut kinguartinneqarluni.

AAMMA ATUARUK Kunngikkormiut umiarsuaat teknikkikkut ajoquteqalerami kalinneqarluni talittarfimmukaanneqartoq

Dronningip pisortatigoortumik tikeraarnissaa arfininngormat ajornartuulerpoq, kunngikkormiummi umiarsuaat Dannebrog teknikkikkut ajornartorsiulermat. Dannebrog aqqutigalugu kunngikkormiut angalakkajupput.

Kunngikkormiut umiarsuaat Dannebrog suli Flådestation Frederikshavnimiippoq. Kunngikkormiut Dannebrog pillugu suli nutaarsiassaqanngillat.

Dronning Margrethe Kalaallit Nunaannut aasaq manna aamma tikeraassaaq. Dronningip nunatsinnut tikeraarnissaa pilersaarutit naapertorlugit juulip ulluisa 27-annit aggustip ulluisa tallimaata tungaanut pisussatut pilersaarutigineqarpoq.