- Illoqarfiit pingaarnersaani Nuummi nerersuartitsinissami Naalakkersuisut qaaqqusisuussapput, Kalaallit Nunaatalu biskopeqarfiani nutaatut biskopiulersussap Paneeraq Siegstad Munkip Hans Egedep Oqaluffiani biskopinngortinneqarnerani Dronningi peqataasaaq. Assi: Jonas Løvschall-Wedel/KNR

Dronning Margrethe nunatsinnut oktobarimi tikeraassasoq

Dronningip tikeraarnissani corona pissutigalugu kinguartinneqareersorlu nunarput oktobarip ulluisa arfineq-pingajuannit aqqaneq-aappaanut tikeraarnialerpaa.

Dronning Margrethe nunatsinnukalerpoq.

Dronningip nunarput juulimi aggustimilu tikeraartussaagaluarpaa, Naalakkersuisulli siulittaasuata, Múte B. Egedep (IA) taassuma tikeraarnissaa piffissami tassani coronamik tuniluuttoqarnera pissutigalugu kinguartinneqarsinnaanersoq apeqqutigaa.

Tikeraarnissanilu kinguartippaa. Múte B. Egedep dronningi maanna qaaqqoqqippaa.

Dronningip nunarput oktobarip ulluisa arfineq-pingajuannit aqqaneq-aappaanut tikeraassavaa.

AAMMA ATUARUK Dronningi nunatsinnukarniarunnaartoq

Naalakkersuisut tusagassiuutinut nalunaarummi allapput.

Dronning Margrethep Ilulissat, Nuuk, Pituffik Station Nordilu tikeraassavai.

- Qeqertarsuup Tunuani Ilulissaniinnermini Ilulissat Kangiata Illorsua, qanittukkut atoqqaartinneqartoq issittumilu pinngortitap pissusaanik siammarteriviusussaq, UNESCO-llu nunarsuarmiut eriagisassaattut allattorsimaffianut ilanngunneqarnikuusoq Dronningip ilaatigut pulaassavaa, Naalakkersuisut allapput.

Aammattaaq issittumi ilisimasassarsiortartup atuakkiortortullu, Knud Rasmussenip pisimaneranik ukiunik 100-inngortorsiornermi taassuma inunngorfiani Dronning malunnartitsissaaq.

Biskoppinngortitsineq

Dronning Margrethep biskoppiulersussaq, Paneeraq Siegstad Munk Nuummi ilassissavaa.

Illoqarfiit pingaarnersaani Nuummi nerersuartitsinissami Naalakkersuisut qaaqqusisuussapput, Kalaallit Nunaatalu biskopeqarfiani nutaatut biskopiulersussap Paneeraq Siegstad Munk-ip Hans Egedep Oqaluffiani biskopinngortinneqarnerani Dronningi peqataasaaq.

AAMMA ATUARUK Dronning Margrethe nunatsinnut tikeraalerpoq: Kangianiit kitaanut

- Dronningip Kalaallit Nunaanut tikeraarnera nunatsinni kunngip siullerpaamik tikeraarneranit ukiut 100-nngornerani pisussanngorpoq. Danskit kunngeqarfiani kunnginit siullersaalluni Dronningip aataava Christian 10. nunatsinnut 1921-mi tikeraarpoq, ukiullu 100-nngornerat dronningip Nuummi tikerarnerani piffinni assigiinngitsuni malunnartinneqassalluni.

Dronning tamatuma saniatigut Hans Egedep nunatsinnut tikinneranit ukiut 300-nngorneranik Ilisimatusarfimmi aaqqissuussinermi malunnartitsisoqalerpat Dronningi peqataassaaq.

Dronningip tikeraarnini nunatta avannaanut Pituffimmi sakkutooqarfimmut namminerisaminik tikeraarluni naggasissavaa.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl