Dorisip kommunit tamaasa aanngaajaarniutit pillugit politikkeqalersikkusukkai
Doris Jakobsenip Naalakkersuisut pinaveersaartitsineq pillugu suliniutissaat, ilaatigut hashimik atornerluinerup millisarniarneqarnissaanut iliuusissat, saqqummiuppai.
Peqqissutsimullu naalakkersuisoq Meeqqallu illersuisuat isumaqatigiipput meeqqat aanngaajaarniutillu pillugit iliuusissat arlallit ujartoqatigiinniarlugit. Naalakkersuisoqarfik tusagassiorfinnut nalunaaruteqarluni taama allappoq.
AAMMA ATUARUK Meeqqat Illersuisuata meeqqat hashimik atuinerat kamaatigaa
Kommunini tamani aanngaajaarniutit pillugit politikkeqalernissaq
Illuatungeriit Kalaallit Nunaanni kommunit tamaasa kaammattorpaat aanngaajaarniutit pillugit politikkeqalernissaannik ilaatigut hashimik pinaveersaartitsineq siunertaralugu.
- Kanukokap siulittaasuata ataatsimeeqatiginissaanut piareersimavunga aanngaajaarniutit pillugit politikkeqalernissap eqqartornissaa anguniarlugu, Doris Jakobsen oqarpoq.
Ataatsimeeqatigiit aamma isumaqatigiissutigaat Naalakkersuisut hashimik atornerluinerup akiorniarneqarnerani iliuusissaat MIO suleqatigalugu kajumissaarutigineqassasoq.
Aammattaaq meeqqat nunaqarfimmiut pillugit ilisimasanik avitseqatigiissallutik isumaqatigiipput, MIO-p aggustip ingerlanerani nunaqarfiit 17-it tikeraassammagit Doris Jakobsenillu Uummannaq nunaqarfiillu aamma septembarimi tikeraassammagit.
AAMMA ATUARUK VIDEO Meeqqat inuusuttullu ikiaroornartumik atornerluinerat eqqummaariffigineqarpoq
AAMMA ATUARUK VIDEO Meeqqat quliniit 12-it missaannik ukiullit ikiaroortut naammattoorneqarput