VIDEO Meeqqat quliniit 12-it missaannik ukiullit ikiaroortut naammattoorneqarput

- Tummeqqat naqqani niperpalummat taavalu tipimik allagisaqarlunga alakkarlugit oqalulersungalu qimaapput, ingerlaannavillutik. Taava atortorisimasatik qimassimagaat takuakka, qimaanerminni, Malakias Jakobsen KNR-imut oqaluttuarpoq.

Pinaveersaartitsisulli meeqqat akornanni ikiaroornartumik atuisoqartarneranik ajornatorsiut pillugu tusagaqarsimanngillat.

- Tassa aatsaat uanga tusarpara taamattoqarsimasoq. Una ajornartorsiutigilaarparput aasaanerani massakkut atuarfik sulinngiffeqarpoq taamatullu meeqqat ulluinnarni attaveqarfigiunnaartutut ikkatsigit, Politikommissær Bent Ole Kleist KNR-imut oqarpoq.

Aamma atuaruk Paasisaanissartik ernummatigalugu peqataajumajunnaartut

Pisorlu ilungersunartutut nalilerneqarpoq.

- Meeqqat taakkua pisuutikkusunngilakka, kisianni uagut inersimasut ullumikkut maligassiuinerput taamalersimavoq meeqqanut, Malakias Jakobsen oqarpoq.

Ikiaroornartumilli akiginiaasartut tusarsaapput:

- Tassa taanna qangali tusallattaartarparput taamaattoqartartoq, uani illoqarfittaami soorlu arlaanni taamatut nikorfaartoqartartoq, akiginiaasoqartartoq tusartarparput, aamma arlaleriarluta immikkut sammisaqarfigisaqarnikuusarput, taanna paasiniarlugu ilumut taamaattoqartarnersoq, Bent Ole Kleist oqarpoq.

- Ikiaroornartulerinermik suliallit uanga isigerusunneruakka inuttut misigissuseqanngitsut, ajuusaarnaqaaq tamanna, Malakias Jakobsen oqarpoq.