Meeqqat Illersuisuata meeqqat hashimik atuinerat kamaatigaa
Qaqortumi qanittukkut meeqqat hashimik pujortartut naammattoorneqarput. Tamanna Qanoroormi oqaluttuarineqarpoq, maannalu Meeqqat Illersuisuat qisuariaateqarpoq.
- Tusaqqaaratsigu meeqqat taama mikitigisut hashimik atuisimasut, soorunami tupappugut, aamma sakkortuumik qisuariarfigivarput, Meeqqat Illersuisuat Aviaja Egede Lynge oqarpoq.
Tupaallaatiginngikkaa
Taassumalu tikkuarpaa, meeqqat taamatut ukioqartut hashimut qanillisussaanngimmata. Taamatulli pisoqartarnera ajoraluartumik ulluinnarsiutaasoq.
Aamma atuaruk Meeqqat quliniit 12-it missaannik ukiullit ikiaroortut naammattoorneqarput
- Soorunami inuiaqatigiinni tusaamasarparput, ajornartorsiut una meeqqanut allaat apuuttartoq. Kisianni uani allaassutigivaa, toqqaannartumik uppernarsillugu takugatsigu, Aviaja Egede Lynge oqarpoq.
Siusinaarluni hashitortaleraanni pinngitsoorsinnaajunnaarneranut qanillisaataasarpoq, tamatumalu saniatigut meeqqat ilikkarniarnerannut ajoqusiisarluni.
Atornerluineq eqqumaffigineqarneruli
Naalagaaffiit Peqatigiit Meeqqat pillugit isumaqatigiissutaat Kalaallit Nunaanni eqquutsinneqartariaqartoq Meeqqat Illersuisuata uparuarpaa, tassani meeqqat hashimut illersorneqartariaqarput. Taamaattumik ujartorpaa, meeqqat hashitortartut ukkatarineqarnerunissaat, akisussaasullu akisussaaffitik ilungersuunnerusariaqaraat.
- Uanilu oqartariaqarpugut, angajoqqaat soorunami akisussaapput. Kisianni aamma taamatut pisoqarsinnaappat politikkitigut allatigullu iliuuseqarneq annikippallaarpoq, Aviaja Egede Lynge oqarpoq.
