Demokratit Donald Trump uppiseriaqqinniaraat
![](/sites/default/files/styles/image_934x467/public/article_images/20210113-095531-l-1920x1279we.jpg?itok=NvAW8KwR)
USA-p præsidentiata Donald Trumpip qanoq pineqarnissaa pillugu suliaq pissanganarsiartuinnarpoq. Trumpimi naalakkersuinermut akisussaasumut eqqartuunneqaqqissanersoq pillugu, USA-mi innuttaasut sinnerlugit sinniisoqarfimmi, tassa Repræsentanternes Husimi, ullumi taasissutigineqassaaq, demokratit siunnersuutaat taasissutigineqassaaq, amerlanerussuteqarnissartillu neriuutigaat.
Trumpillu eqqartuunneqaqqinissaanut amerlanerussuteqartoqassappat USA-mi præsidentit akornanni Trump siullersaalluni aappassaa eqqartuunneqassaaq. DR taama oqaluttuarpoq.
Repræsentanternes Husimi ilaasortat akornanni amerlanerussuteqartut eqqartuussisoqarnissaanut taasiumaartut, nittartakkap Kongressen.com-ip aaqqissuisuunerata Anders Agnerip ilimagaa.
- Trumpimut tamanna pitsaavallaarunanngilaq, naalakkersuinermummi akisussaasumut eqqartuuneqarnissaatut isikkoqarpoq. Eqqartuunneqarnissaamummi amerlanerussuteqartut taasiumaartut qularnanngilaq. Suliarlu taamaasilluni senatimut ingerlateqqinneqassaaq, Anders Agner DR-imut oqarpoq.
AAMMA ATUARUK Pelosip Trumpimut eqqartuussivilersuutsiniarneq piareersaraa
USA-mi inatsisartut Washingtonimi ataatsimiittarfiannik saassussisoqarnissaanut Trump sapaatip-akunnerata siuliani kajumissaarisimanersoq, Repræsentanternes Husimi ilaasortat taasissutigissavaat.
Demokratit Repræsentanternes Husimi amerlanerussuteqarput, republikanerilli sinnerlugit ilaasortat arlallit eqqartuussisoqarnissaanut tapersersuinertik nalunaarutigereerpaat. Nutaarsiassaqartitsivik Ritzau taama allaaserisaqarpoq.
USA-p tunngaviusumik inatsisaanik immikkoortup 25-p atuutilersinneqarnissaa demokratit sinnerlugit Repræsentanternes Husimi ilaasortat unnuaq taasissutigigaluarpaat. Immikkoortoq 25 præsidentip peersinneqarnissaanut tunngavoq, præsidentilli tullersortaata Mike Pencep immikkoortup taassuma atuutilersinneqarnissaa tapersersunngilaa.
Pencep taamaaliorneratigut Trumpip naalakkersuinermut akisussaasumut eqqartuunneqarnissaa pillugu Repræsentanternes Husimi taasisoqarnissaa demokratit sulissutigivaat.