Pelosip Trumpimut eqqartuussivilersuutsiniarneq piareersaraa
USA-p præsidentiata Donald Trumpip naalakkersuinermut akisussaasumut eqqartuussaanissaata aallartinneqarnissaa, USA-mi innuttaasut sinnerlugit sinniisoqarfiup, tassa Repræsentanternes Husip, siulittaasuata Nancy Pelosip, piareersaleruttorpaa.
Pelosi Demokratit sinnerlugit ilaasortanut taama allappoq. Nutaarsiassaqartitsivik Ritzau taama allaaserisaqarpoq.
Donald Trump præsidentitut peersitaanngikkuni naalakkersuinermut akisussaasumut eqqartuussineq aallartissallugu piareersimaffigigini Pelosip ilaasortanut allagaqarnermini oqaatigaa, præsidentip tullersortaata Mike Pencep, USA-p tunngaviusumik inatsisaani immikkoortoq 25 atorlugu præsidentip tunuartinneqarnissaanik sulissuteqanngippat Pelosi demokratillu eqqartuussinialerlutik.
Nutaarsiassaqartitsiviit AP AFP-lu taama allaaserisaqarput.
AAMMA ATUARUK Trumpimut illersuisut Kongressimut isaasut: Illorsuaq isumannaarneqartoq
USA-p tunngaviusumik inatsisaani immikkoortoq 25 atorlugu præsidentip tullersortaa, naalakkersuisoqatinilu amerlanerussuteqartut præsidentimik tunuartitsisinnaapput, præsidenti atorfimminut naleqqutinngitsutut nalilerneqassappat tunuartinneqarsinnaalluni.
Periarfissallu taassuma atorneqarsinnaanissaa Pencep tunuarsimaarfiginngikkaa, tusarfiit ilaata Pencemut qanittup, CNN-imut oqaatigaa.
USA-mi demokratit Trump pissaaneqarnini atornerlullugu eqqissiiviilliortoqarnissaanut kajumissaarisimasutut pasivaat, Trumpimmi tapersersuisui USA-mi inatsisartut ataatsimiittarfiat sapaatip-akunnerata siuliani pingasunngormat saassuppaat.
AAMMA ATUARUK Demokratit Trump eqqartuussivilersuullugu politikikkut mattukkusukkaat
- Tunngaviusumik inatsiserput, tamallu oqartussaaqataanerat illersorniarlugu sukkasuumik iliuuseqarniarpugut, maannakkummi præsidentiusup tunngaviusumik inatsit tamallu oqartussaaqataanerat qajannarsisippai, Nancy Pelosi, demokraatinut Repræsentanternes Husimi ilaasortanut taama ilaatigut allappoq.
Trumpip præsidentitut atuuffiata naanissaanut ullualuinnanngortut suliaq ilungersunartututut aammali sukkasuumik suliarineqassasoq, Polosip oqaatigaa.
/ritzau/