Demokratit Trump eqqartuussivilersuullugu politikikkut mattukkusukkaat

Trump sapaatit akunneri marluk qaangiuppata præsidentiujunnaartussaagaluartoq, demokratit Trump naalakkersuinermi akisussaasumut eqqartuussivilersuunneqarnissaa USA-mi Washington D.C.-mi eqqissiviilliortoqareernerani anguniarpaa.

Trumpip maanna præsidentitut peersinneqarnissaa angunianngikkaat siunissamulli isigalutik taamaaliortut, inatsisilerinermi misissueqqissaartartoq Emil Friis Lauszus naliliivoq.

Taanna Washingtonimi najugaqarpoq, USA-milu eqqartuussiveqarnikkut suleriutsinik immikkut ittumik inatsisilerituujuvoq. Taanna Kongressimi eqqissiviilliortoqarnerani nammineerluni illorsuarmiippoq.

- Demokratit Trumpip 2024-imi qinigassanngorteqqinnginnissaa anguniarlugu naalakkersuinermi akisussaasumut eqqartuussivilersuipput. Tamannalu anguneqarpat taanna iliuuseqarsinnaajunnaassaaq, Emil Friis Lauszus oqarpoq.

AAMMA ATUARUK Joe Bidenip ajugaanera Kongressip uppernarsarpaa

Politikerit naalakkersuinermi akisussaasumut eqqartuussivilersuunneqarnikut præsidentissatut sassaqqissinnaanissaminnut atorsinnaanngitsutut tunuartinneqartartut arlallit isumaqarput, Donald Trumpilu tamaaliorniarluni isumaliutersuuteqarpoq.

Donald Trump naalakkersuinermi akisussaasumut eqqartuussivilersuunneqarniarnera siullermiilinngilaq.

Taanna Senatimi siorna pinngitsuutinneqarpoq. Tamatumuuna pinngitsuutinneqaqqissanersoq nalilersoruminaattoq, Emil Friis Lauszus isumaqarpoq.

- ilimananngilaq, Repræsentanternes Husimimi sulissutigineqalereerpoq. Kisianni maannangaaq nalileruminaappoq, taanna oqarpoq.