Demokraatit ukiortaami oqaaseqaataat
-Paasissutissap massuma tuparujussuartippaanga, aliatsatsillunga aammalu aalajangersimalluinnartumik taassuma isummersippaanga, Per Berthelsen allappoq nangillunilu:
-Isummerpunga siunissami Demokraatit malunnarnerpaamik suliassarissagaat meeqqat akornanni piitsuuneq peerneqassasoq, tassungalu atatillugu meeqqat, inuusuttut ilaqutariillu atugarisaat pitsanngorsarneqassasut, Demokraatit siulittaasuat qanorpiaq pissutsinik allannguiniarnerminnik nassuiaavoq.
Demokraatit siullertut siunnersuutigisimagaluarpaat ukiut tallimat iluanni 100 millioni koruunit suliniutinut agguarneqassasut, sinaakkutit pissutsillu meeqqanut pitsanngorsarnissaannut suliniutissatut pilersitsiniarnermut siunertaasussanik.
Taamaammat takujumaarparsi, Inatsisartut upernaakkut ataatsimiinneranni Demokraatit siunnersuutaat tamangajalluinnarmik meeqqanut, inuusuttunut ilaqutariinnullu tunngajumaarmata. Takujumaarparsi Demokraatit ataavartumik qitiutissagaat, meeqqat inuusuttullu tamaasa inuunermik pitsaanerusumik tunineqarnissaat. Takujumaarparsi, Demokraatit pimoorutivikkaat, meeqqat akornanni piitsuusoqarnera nungunneqassasoq, atugassarititaasullu meeqqanut inuusuttunullu tamanut pitsanngorsarneqarnissaat isummerfigimmassuk, Kalaallit Nunaanni 2008-mi tamanit sallersaalluni qulequtaritinniarmassuk pimoorullugu.
