Isummersorfik Demokraatit Siumut qinersiveqarniarnera sianiitsuliorluinnarneruneraraat
Siumut inatsisartuni gruppiata qinersiviit atuutilerseqqikkusuppai – siunnersuut taanna partiimut nammineq iluaqutissartaqarpoq, partiinulli minnernut ajornarnerulersitsissalluni.
Taamaammat qinersiviit Isummersorfimmi sisamanngormat oqallisigineqarmata isumaqatigiinngittoqarpoq:
- Qanoq oqassanerlunga, ilaatigisassaasut oqarusuppunga, Demokraatit siulittaasuat, Randi Vestergaard Evaldsen oqarpoq.
AAMMA ATUARUK Siumut tikisitat taasisinnaatitaanerannik killiliiniartoq
Qinersiviit partiinut minnernut soorlu Demokraatit Inatsisartunut iserniarnissaanut ajornarnerulersitsissapput, taamaakkaluartorli partiit anginerusut ass. siunnersuusiortut, Siumut tamanna iluaqutigissavaat.
Høegh: Illoqarferujussuit tamat oqartussaaqataanerannut sapaginniivoq
Siumumit Inatsisartunut ilaasortap, Pitsi Høeghip qinersiviit nunatsinni sumiiffiit tamarmik sinniisoqarfiit iluaqutigissagaat aalajngersimaannarpaa, siunnersuullu inatsisartunut qinersinissamut Siumumut iluaqutissartaqarnissaa pineqannginnerarlugu:
- Illoqarferujussuit anginerinnaat nukittoorujussuarmik maannakkut inissisimapput, taamaammat nalingiinngitsumik inissisimasoqarpoq. Ineriartorneq taama ingerlassappat tamat oqaasissaqaqataanerat sapaginneqartutulluunniit isigisinnaavarput, taamaammat kikkut tamarmik, illoqarfiit tamarmik sinniisoqalernissaat uagut qulakkeerusupparput, Pitsi Høegh oqarpoq.
AAMMA ATUARUK Politikerit qinersivinnik pilersitseqqikkusukkunik eqqarsarluaqqaartariaqartut
Pitsi Høeghip qinersiviit siumumut iluaqutissartaqarnerat aamma nassuerutigaa:
- Partiit arlaat sineriammiit qinerneqarnissamut qulakkeerissaguni, Inuit Ataqatigiit Siumullu qulakkeerissapput. Tassa taakkunani sinniisuutitaqaratta, Høegh oqarpoq.
Demokraatit: Sianiitsuliorluinnarneruvoq
Tamanna Demokraatit siulittaasuata, Randi Vestergaard Evaldsenip Isummersorfiup danskisut ingerlanneqarnerani aalassaatigaa:
- TV-kkut taama oqarneq sianiitsuliorluinnarneruvoq. Siunnersuut aamma Siumumut iluaqutaasussaq. Taamalu oqarneq nassuerneruvoq. Tamat oqartussaanerannut ajornarnerusoq oqarusuppunga. Imminummi sullinneruvoq, Evaldsen oqarpoq.
AAMMA ATUARUK Siunnersuut eqqunngitsumik tunngavilersorneqartoq
Inuit Ataqatigiit oqallinnermi peqataapput, partiillu politikkikkut oqaaseqartartuata, Bendt B. Kristiansenip IA-p Qaanaami Ittoqqortoormiinilu qinersiveqarnissaanut oqallinnissaq piareersimagaa oqaatigaa. IA-li Siumutulli inersiviit tallimat pilersinniarusunngilai.
Qinersiviit pilersinneqarnerat partiit anginerit iluaqutigissagaat, Ilisimatusarfimmit, inuiaqatigiilerinermi ilisimatooq, Birger Poppel naliliivoq.
AAMMA ATUARUK Politikerit qinersivinnik pilersitseqqikkusukkunik eqqarsarluaqqaartariaqartut
Qinersiviit qanoq qinersinermut kinguneqarsinnaanerannut assiliartaliinissamut nunatsinni qinersiviit arfineq pingasuuneranni inatsisartunut qinersinerit siulliit ilaat assersuutigaa:
Tassani Inatsisartunut qinikkanit 21-nik Siumut 13-eraarput – taamaalilluni amerlanerussuteqalerluni.
Isummersorfiup sisamanngornermi aallakaatinneqarnera tamaat uani takuuk:
