Siumut tikisitat taasisinnaatitaanerannik killiliiniartoq
Tikisitat nunatsinni sunniuteqarpallaartut Siumumi isumaqarput. Gruppi Inatsisartuni oqallinnissamik siunnersuutimini ima allappoq:
- Isumaqarpugut inuit ukiup affaa maaniiginnarlutik qinersisinnaalersartut naleqqutinngitsumik sunniuteqarfigisaraat nuna naalagaaffinngornissaminut suliaqaruttulersoq.
Taamaattumik Siumup qinersisarnermi inatsisip allanngortinnissaa pillugu oqallinnissaq kissaatigaa. Suliartortitallu ukiut marluk arfineq-marlullu akornanni nunatsinneeqqaarlutik taasisinnaatitaalernissaat, Siumup siunnersuutigaa.
Naalakkersuisullu upernaakkut ataatsimiinnissamut qinersisarnermi inatsisip allannguutissaanik suliaqarlutik aallartissasut, partiimit piumasaraat.
AAMMA ATUARUK Avataanit suliffissarsiortut sukateriffiginiaraat
Demokraatit: Tamat oqartussaanerannut naapertuutinngilaq qujatsuinnerullunilu
Inatsisartunut qinersineq qaammatit arfinillit sioqqulluguli nunatsinneereertut, 18-it sinnerlugit ukiullit, Danmarkimilu innuttaasutut pisinnaatitaaffeqartut Inatsisartunut qinersisinnaatitaaffeqartut sullissivik.gl-imi atuarneqarsinnaavoq.
Tassalu danskit savalimmiormiullu nunatsinnut sunniuteqarpallaartut Siumumi isumaqarput.
Tamannalu Demokraatineersup, Justus Hansenip, tamat oqartussaaqataanerannut naapertuutinngitsutut qujatsuinnerusutullu taavaa.
- Kusananngilaq aamma pissuserissaarnissamut isumat uniorlugit iliorneruvoq Demokraatinilu neriuutigeqaarput uanguinnaanngitsoq eqqarsaatit taamaattut itigartilluinnarumaaraat. Nunami demokratiskiusumi taamatut eqqarsartoqarsinnaanngilaq, Justus Hansen tusagassiuutinut nalunaarummi allappoq.
Danmarkimi aalajangersimasumik najugallit, 18-it sinnerlugit ukiullit Danmarkimilu innuttaassuseqartut Folketingimut qinersisinnaatitaapput.
Tikisitat sunniutigisinnaasaasa sorliit Siumumit kissaatigineqannginnersoq paasiniarlugu Siumup gruppianut attaveqarniarsarivugut.
