Avataanit suliffissarsiortut sukateriffiginiaraat

Allannguiniarnerli sulisitsisulli peqatigiiffiata piffissaajaataasoraat.

-  Kommuni akissuteqartuaannanngimmat qinnuteqarnissamut piffissaliussaq allanngortinneqassappat sulisitsisoq nalornisilerneqassaaq, GE-mi inatsisilerinermut siunnersorti Lars Krogsgaard-Jensen oqarpoq.

Inatsit atuuttoq malillugu qinnuteqartoq ullut 14-it iluanni akissutisinngikkaangat, qinnuteqaataa akuerineqartutut nalilerneqartarpoq.

Qinnuteqaat kommunalbestyrelsimit ullut 14-it qaangiutsinnagit aalajangiiffigineqartassasoq piumasaqaataalissaaq. Qinnuteqaatit akineqanngitsut akuerineqaannartarnerat taamaasilluni atorunnaassasoq, Naalakkersuisut siunnersuutigaat.

Avataaniit sulisussarsiortarneq nunatsinni sulisussaaleqinermik peqquteqartoq, GE oqarpoq. Taamaammat sulisitsisut nunatta avataani sulisussarsiupallassinnaanissaat pingaaruteqarpoq.

- Sulisussaaleqigaanni sulisussarsipallannissaq qaqugulu sulisussaqalersinnaaneq paasilertussallugu pisariaqartinneqartarpoq, Lars Krogsgaard-Jensen oqarpoq.

Suliffeqarnermut Naalakkersuisoq oqaaseqartinniaraluaratsigu iluatsinngilarput.