Demokraatit: Meeqqat atuarfiat sallinngortittariaqarparput
- Iliuuseqartariaqarluinnarpugut, meeqqammi atuarfiat iluarsaanneqartariaqartoq, qimerloorneqartariaqartoq kivinneqartariaqartorlu tamatta nalunngilarput. Taamaammat immikkut aningaasaliissagutta meeqqat atuarfiat, meerartagut inuusuttortagullu ukkattariaqarpagut, Demokraatineersoq, Tillie Martinussen KNR-imut oqarpoq.
Aamma atuaruk Immanuelsen: Aningaasat sulisillik
Meeqqalli atuarfiat nukittorsarniarlugu aningaasat pisariaqartut sumi nassaassaanersut oqaatigerusunngilaa. Siumumeersulli Jens Immanuelsenip kujataani aallisartut ikiorsiisarnissamut aaqqiinemik siunnersuutaa tapersersunngilaa.
- Arlaannaannilluunniit kinguartiterinissaq pisariaqassasorinngilara. Ikiorsiisarnigulli assigiinngitsut eqqumiikajaartullu sumut tamaannga tunniussutiinnarsinnaanngilagut, Tillie Martinussen oqarpoq.
Naalakkersuisut aningaasanut inatsisissatut siunnersuutaat Sulisitsisut peqatigiiffiata isornartorsiorpaat, ukiuni tulliuttuni sisamani ataqatigeeqqalaaginnartusanngorlugu suliaammat.
Aamma atuaruk GE: Patajaallisaalinnginnerput toqqissisimananngilaq
Siunnersuummi naapertorlugu Nunatta Karsia 2020-ip tungaanut katillugit 100.000 koruuninik sinneqartooruteqassaaq, sulisitsisullu taamaannera aarlerinartoqartippaat, massakkorpiarmi pingaartumik aalisarnikkut Nunatta aningaasaqarniarnera ajunngilaq.
Taamannallu Eqqasuunneq Tillie Martinussenip paasisinnaavaa.
- Soorunami aningaasaqarnitta ataqatigeeqqalaaginnarnera ernumanarpoq, taamaattumillu siuariaataanngitsumik aningaasanik atuinnginnissarput pingaaruteqarpoq, Tillie Martinussen oqarpoq.
Aamma atuaruk Illuutillit akileraartarnermi ilanngaateqalernissaat Atassutip siunnersuutigaa
Atassutilli illuutillit akileraartarnerannut ilanngaatissaat pillugu siunnersuutaa tigulluarpaa.
Naatsorsukkanilli pilersaarutinillu sukumiinerusunik takusaqartinnanga angersinnaanangalu naaggaarsinnaanngilanga. Isumali ajunngilaq, Tillie Martinussen oqarpoq.
Ukiumut 3 millionit koruuninik immikkoortitsisoqartassasoq Atassummit piumasarineqarpoq.
Aamma atuaruk IA: Inuit atugarissaarnerat sinneqartoornermit pingaarneruvoq
Aamma atuaruk Aningaasanut inatsisissaq sinneqartooruteqartoq
