Aningaasanut inatsisissaq sinneqartooruteqartoq
Nunatta Karsiata 2017-imi 33 millionit koruuninik sinneqartoornissaa Naalakkersuisut aningaasanut inatsisissatut siunnersuumminni missingersorpaat. Ukiunili tulliuttuni amigartoorutitalimmik missingersuisoqarpoq, aappaagumiillu 2020-ip tungaanut missingersuutini katillugit 100.000 koruuniinnarnik sinneqartooruteqarnissaq Naalakkersuisut naatsorsuutigaat.
Randi Vestergaard Evaldsenip aningaasanut inatsisissatut siunnersuut pingasunngornermi ullup qeqqanut tusagassiortunik katersortitsinermini saqqummiuppaa, 33 millionit koruuninillu sinneqartooruteqarnissamik naatsorsuuteqaraluarluni pisortat aningaasartuutaat amerlanerulersinnissaat akueriumanngilai.
Aningaasaqarnermut naalakkersuisup saqqummiinermini oqaatigaa, Nunatta karsiata sinneqartoornissaanut naatsorsuuteqarneq aalisakkanut akit pitsaasuunerinik peqquteqartoq, NunattalI aaqqissuussaanerani ajornartorsiutit iluarsiiviginiarlugit suli aaqqissuusseqqinnissat pisariaqartut, ilaatigut utoqqaat amerliartorneri sulisinnaasullu amerlasuut suliffissaaleqinerat ilaatigut pissutaallutik.
2017-imut aningaasanut inatsisissatut siunnersuut innuttaasunut nuanninngitsunik tupaallatsitsinngilaq. Akileraarutimmi akiitsuutillu malunnaatilimmik qaffannissaat naatsorsuutigineqanngilaq.
Pituffimmili kiffartuussinissamik isumaqatigiissutikkut isertitat 45 millionit koruuniusut annaaneqarnissaat Naalakkersuisut naatsorsuutigaat.
Tassanngaanniilli annaasat Nunatta aningaasarsiorluarneratigut, akileraarutinit akitsuutiniillu isertitarissaarnerunikkut matussuserneqassapput.
