Immanuelsen: Aningaasat sulisillik

Aningaasanut inatsisissatut siunnersuut sinneqartooruteqartussatut missingersorneqarpoq. Aningaasalli Nunatta Karsiani katersuinnarnagit, inuiaqatigiinni sulitinneqarnissaat pingaarnerusoq, aningaasaqarnermut ataatsimiititaliami siulittaasoq, Siumumeersoq, Jens Immanuelsen isumaqarpoq.

Allattoq Thomas Munk Veirum, Sara K. Jakobsen, Jens Thorin

aggustip 12-at 2016 14:32

- Uani pingaartorujussuuvoq aningaasat sulisinneqarnissaat. Aningaasat sulisinneqarnerasigut pissarsiaq angineq pissavarput, Jens Immanuelsen oqarpoq.

Nunatta Karsiata 2017-imi 33 millionit koruuninik sinneqartoornissaa Naalakkersuisunit missingersorneqarpoq, 2020-llu tungaanut missingersuutini katillugit 100.000 koruuniinnarnik sinneqartooruteqarnissaq naatsorsuutigineqarluni.

Aamma atuaruk Illuutillit akileraartarnermi ilanngaateqalernissaat Atassutip siunnersuutigaa

- Maannakkut aningaasanut inatsimmi sinneqartooruteqarluni ingerlatsinissamik saqqummiussaq ilumut taamatut isikkoqarluni naammassineqassanersoq pingajussaaneernissap tungaanut aningaasamut inatsimmik suliaqarnermi suleqataaffiginissa piareersimaffigilluinnarparput, Jens Immanuelsen oqarpoq.

Aamma atuaruk IA: Inuit atugarissaarnerat sinneqartoornermit pingaarneruvoq

Inuussutissarsiutigalugu aalisartut tapiissutisinissamut periarfissaqanngillat, tamannalu Siumup allanngortikkusuppaa.

- Tapiissutitalimmik umiatsiaarartaarsinnaaneq killeqarami. Tamakkununnga periarfissap Nunatta kujataanut aaqqissuussivigineqarnissaa pisariaqarluinnartutut isigivarput.

Aningaasanut inatsisissaq pillugu isumaqatigiinniarnermi aatsitassanut naalakkersuisoqarfiup qinnuteqaatinik suliarinnittarnerata pitsaanerusinnaanera Siumup aamma ujartorniarpaa.

Aamma atuaruk Aningaasanut inatsisissaq sinneqartooruteqartoq

- Isumassarsinermiit pilersitsinissap tungaanut aqqut sivisuallaarujussuarpoq. Tamatuma eqaannerusumik aaqqissuunneqarsinnaanera aqqutissiuuttariaqarpoq.

Nutaarsiassami kukkunermik nassaarsimaguit uunga allaffigineqarsinnaavugut.