Illuutillit akileraartarnermi ilanngaateqalernissaat Atassutip siunnersuutigaa

Illuutillillu akileraartarnermi ilanngaateqalerunik suliffissanik amerlanernik pilersitsisoqarsinnaasoq Nunattalu aningaasarsiorneranut siuarsaataasinnaasoq, Steen Lynge tassa isumaqarpoq.

- Sanasut mikinerusunik suliffeqarfiutillit sulisussanik amerlanernik atorfissaqartitsinissaat angussavarput ataavarnerusumillu suliassaqarnissaat qulakkiissavarput, taamaasillutalu suliffissanik pilersitsilluta.

Steen Lynge Danmarkimi misilittakkanut innersuussisoq taama oqarpoq.

Illuutillit illuutiminni silap pissusaanut iluaqutaasussamut aningaasaliissappata akileraarnermi 20.000 koruuninik ilanngaateqarnissaat, innuttaasullu akissarsiaminnit ilanngaatissaareriigaasa qaavatigut ilanngunneqartarnissaat siunnersuutaavoq.

Tamatumunngalu ukiuni sisamani tulliuttuni ukiumut 3 millionit koruuninik immikkoortitsisoqartassasoq Atassummit piumasarineqarpoq.

Tamatuma saniatigut Pinngortitaleriffimmut 500.000 koruunit 1 millionit koruunillu akornannik immikkoortitsinerusalernissaq, Atassutip kissaatigigaa Steen Lynge oqarpoq.

Taassumallu aningaasanut inatsisissatut siunnersuutip ukiuni sisamani tulliuttuni sinneqartooruteqarfiusussaalaarnera iluarisimaarpaa. Aamma sanaartornissamut 702 millionit koruuninik immikkoortisoqarmat nuannaarutigaa.

- Taamaasilluni aamma suliffissanik pilersitsinissaq ilaatigut anguneqartussaassalluni, ataavartumillu aamma sanaartornerup ingerlannerani kinguneqarsinnaanera Atassumminngaanniit iluarismaarparput

Steen Lynge taama oqarpoq.