IA: Inuit atugarissaarnerat sinneqartoornermit pingaarneruvoq
Aningaasaqarnermut naalakkersuisup, Randi Vestergaard Evaldsenip aningaasanut inatsisissatut siunnersuut pingasunngornermi saqqummiuppaa. Ukiut tallimat matuma siorna kingullermik sinneqartooruteqartussamik aningaasanut inatsisiliortoqarmat aningaasaqarnermut naalakkersuisoq naammagisimaarinnippoq.
Aamma Inuit Ataqatigiit Nunatta aningaasaqarnerata siuariartornera nuannarutigaat. Partiilli politikkikkut oqaaseqartartuata inuit atugarissaarnissaat kisitsisinit pingaarnerutippaa.
- Aningaasaqarnikkut inissisimaneq nuannaarutigineqarpoq, kisianni aningaasaqarnikkut inissisimaneq aatsaat pisarpoq, inuk nunami maani atukkamigut malunnaatilimmik siuariarsimagaangat, Inuit Ataqatigiit politikkikkut oqaaseqartartuat Aqqaluaq B. Egede Naalakkersuisut 2017-imut aningaasanut inatsisissatut siunnersuutaata saqqummiunneqarnerata kingorna oqarpoq, nangillunilu.
- Aningaasat inuillu sanileriitissagaanni, inuk atugarissaartoq, meeqqat isumagineqartut, inuusuttut suliffissallit qitiutillugit aaqqissuusseqatigiinnissarput pappilissani aningaasat kusarnanissaaniit pisariaqarnerpaajuvoq, Aqqaluaq B. Egede oqarpoq.
Aamma atuaruk Aningaasanut inatsisissaq sinneqartooruteqartoq
Aningaasanut inatsisissatut siunnersuut 33 millionit koruuninik sinneqartooruteqarfiussasoq missingersorneqarpoq. Inuit Ataqatigiit partiillu allat siunnersuummut isumaqatiginninniarnernut Randi Vestergaard Evaldsenimit qaaqquneqarput.
Innuttaasut atugarissaarnissaasa saniatigut isumaqatiginninniarnerni sunaqqissaaq aallunneqassanersoq Inuit Ataqatigiinnit maanna misissorneqartoq, Aqqaluaq B. Egede oqarpoq.
- Aningaasanut inatsisissatut Naalakkersuisut siunnersuutaat arlalitsigut isummersorfigaarput, taavalu isumaqatigisagut isumaqatiginngisagullu immikkoortiterlugit. Taamaammat isumaqatiginninniarnernut, taavalu ukiup tulliani Nunatsinni ataatsimoorussamik aningaasanut inatsiseqarsinnaanerput piareersimavugut, Aqqaluaq B. Egede oqarpoq.
Aamma atuaruk Randi: Innuttaasunut ikiorsiissutit ikilineqassapput
Aningaasanut inatsisissamut isumaqatiginninniarnerit ullumi sisamanngornermi aallartissasut, aningaasaqarnermut naalakkersuisup Randi Vestergaard Evaldsenip oqaatigaa.
