Demokraatini siulittaasunngorusuttunik suli sassartoqanngitsoq

Nivi Olsen siulittaasussatut sassassanerluni suli aalajanginngilaq.
- Meeraqarpunga marlunnik taakkulu nalilersuininnut nalitoorujussuupput inuttullu killiffiga, Nivi Olsen oqarpoq.
maajip 25-at 2020 08:51

Niels Thomsen Demokraatit siulittaasuattut novembarimi tunuarmat partii suli siulittaasortaanngilaq. Demokraatinilu siulittaasuugallartoq Nivi Olsen sassassanerluni suli nalornivoq.

- Siusippallaarujussuarpoq oqaatigissallugu kisianni eqqarsaaterpassuupput taassuma tungaasut aalajangernissaq qanoq isikkoqarumaarnersoq. Kisianni imaaliallaannarlunga oqarsinnaanngilanga sassarniarlunga. Assigiinngitsorpassuarnillu taanna peqquteqarpoq.

Demokraatit siulittaasorigallagaat Nivi Olsen oqarpoq.

Pilersaarutit malillugit Demokraatit juunip arfineq-pingajuanni pisarneq malillugu ataatsimeersuassapput. Tassani siulittaasussamut qinersisoqassalluni.

Partiip siulittaasoqarniarnera ajornakusoortoq

Niels Thomsen partiimit novembarimi tunuarmat Demokraatit siulittaasuerupput.

Niels Thomsen Inatsisartunut 2018-imi qinersinermi qinersisikinngilaq, siornalu marsip qaammataani Inatsisartunit sulinngiffeqalerpoq uippakajaarnini pissutigalugu.

AAMMA ATUARUK Niels Thomsen politikkimit tunuarpoq

Sulinngiffeqarnerani Randi Vestergaard Evaldsen siulittaasuugallarpoq, aaqqissuussaanermullu akisussaalluni siulittaasumut tullersorti Nivi Olsen.

Qaammatilli sisamat qaangiummata, tassa siorna juulip qaammataani Randi Vestergaard Evaldsen politikkimit tunuarmat Nivi Olsen siulittaasuugallartunngorpoq.

AAMMA ATUARUK Politikkimit tunuartoq: Randi Vestergaard Brugsenimi pisiortornermi pisortaassasoq

- Piffissaq kingulleq partiitsinnut aamma sakkortusimavoq, tassami inuit pikkorissut partiitsinnit tunuarallarsimammata.

Poorskisioriarnera isorineqaqisoq

Nivi Olsen siulittaasutut sassassanerluni suli aalajanginngilaa, siulittaasunngussagaluarunili inuttut pilliuteqarnissani eqqarsaataani initupput.

- Meeraqarpunga marlunnik taakkulu nalilersuininnut nalitoorujussuupput inuttullu killiffiga.

AAMMA ATUARUK Demokraatit siulittaasuat eqqartuussivimmiissasoq: Toqumik sioorasaarneqarpunga

Coronavirusi pissutaalluni poorskip nalaani illoqarfiit akornini pisariaqavitsinnagu oqartussat angalaqqusinngillat. Nivi Olsenilu Qeqertarsuarmit Ilulissiarnissaminut qinnuteqarami akuerisaavoq, Ilulissanullu poorskisioriarluni.

Sermitsiaq.ag taama allaaserisaqarpoq.

Ilulissiarnera inuiaqatigiinnit sakkortuumik isornartorsiorneqarpoq, tusagassiutitigullu allaaserineqartarnini nukinnik atuiffigisimanerarpaa.

- Pissutsillu piffissaq kingulleq uannut sakkortusimapput tusagassiutitigut saqqummiunneqartarneq imaannanngimmat.

Demokraatinullu siulittaasunngussanerluni suli aalajangersimanngilaa, partiiminnili piukkunnaateqartunik peqarnerarpaa.

- Atimik taasissanngilanga aamma piukkussamik atimik taasissanngilanga kisianni oqaatigiinnarsinnaavara peqarpugut taakkulu piffissaq nallerpat namminneq pisussaaffigiumaaraat sassassallutik isumaqarpunga.