Assi: UN Photo/Elma Okic/Flickr Creative Commons

Camp Century: Danskit kilitsissiaqarsimanerat Samuelsenip ilisimasaqarfiginnginnerarpaa

Danskit oqartussaasuisa sorsunnerup nillertup nalaani Camp Centuryimi sulisitaqarsimanerannut uppernarsaatissanik Nunanut allanut tunngasunut ministereqarfiup allagaateqarfiini nassaassaqanngilaq.

Nunanut allanut tunngasunut ministeri Anders Samuelsen Folketingimi marlunngormat isumasioqatigiittoqarnerani taama ilisimatitsivoq.

Danskip 83-inik ukiullip Erik Jørgen-Jensenip DR-ip piviusulersaarutaani "Manden uden skygge"-mi upernaaq oqaluttuaraa Illersornissamut qullersaqarfiup isertortumik paasiniaasartuinit 1960-imit 1963-imut Camp Centurymut aallartitaasimalluni sakkutooqarfimmi pissutsit pillugit nalunaaruteqartartussatut.

AAMMA ATUARUK Danmark Camp Centurymi kilitsissiaqarsimasoq

Erik Jørgen-Jensenip sakkutooqarfimmiinnermini assilisani ullorsiutiminullu allattorsimasani piviusulersaarummi takutippai.

Nunanulli allanut tunngasunut ministereqarfiup Erik Jørgen-Jensen ilisimasaqarfiginngilaa, allagaatini mikrofilminilu nassaassaqanngilaq, nunanut allanut tunngasunut ministeri Anders Samuelsen oqarpoq.

Nunanut allanut tunngasunut ministereqarfiup paasissutissani misissuiffigisamini Erik Jørgen-Jensen pillugu paasissutissanik nassaarsinnaasimanngilaq.

Kaptajni napparsimalersoq pillugu passissutissaqanngitsoq

Amerikamiu kaptajni, John Page, Camp Centurymi atomimik nukissiorfimmik isumaginnittuusoq, danskillu aallartitaat naapertorlugu atomimik nukissiorfiup qinngorneri pissutigalugit napparsimalersimasoq, Erik Jørgen-Jensenip piviusulersaarummi oqaluttuaraa.

Nunanulli allanut tunngasunut ministereqarfiup allagaateqarfiini aamma John Page taassumalu napparsimalersimanera pillugit paasissutissanik pigisaqartoqanngitsoq, Samuelsenip naqissuserpaa.

AAMMA ATUARUK Saliinissaq pillugu isumaqatigiissuteqarnera allagaatitoqqami paasineqartoq

Siornatigulli saqqummiunneqareerpoq, aamma Nunanut allanut tunngasunut ministereqarfimmit, atomimik nukissiorfiup aallartisarnerani neutronimik gammamillu annertuallaartumik qinngorneqartoq. Tamannalu pissutigalugu USA-p nukissiorfik unitsikkallarpaa assiaqusersorneralu pitsanngorsarlugu.

Illersornissamut ministereqarfimmi sulisut aamma Erik Jørgen-Jensen pillugu paasissutissanik allagaateqarfinni maanna ujaasipput.

AAMMA ATUARUK Regeringen undersøger USA’s ansvar for forurening

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl