Paasisaq: Danmark Camp Centurymi kilitsissiaqarsimasoq
Erik Jørgen-Jensen. Angut Danmarkip USA-p sermersuup iluani sakkutooqarfianut Camp Centurymut ukiuni pingasuni, 1960-imit 1963-imut, isertortumik aallartitaa taama ateqarpoq.
Danmarkip Radioata radiukkut piviusulersaarutaani ”Manden uden skygge”-mi (Angut tarraqanngitsoq, aaqq.) tamanna uppernarsarneqarpoq.
AAMMA ATUARUK Saliinissaq pillugu isumaqatigiissuteqarnera allagaatitoqqami paasineqartoq
Maanna 83-inik ukioqartoq Erik Jørgen-Jensen naapertorlugu, 20-kkut naanerini ukioqarluni Camp Centurymi pisunik nakkutilliinissamik pissutsillu pillugit nalunaaruteqartarnissamik Illersornissamut qullersaqarfiup Isertortumik paasiniaasartuinit (FE) suliakkerneqarpoq.
Sakkutooqarfiup Danmarkimit akuerineqaqqaarani ilisimatuussutsikkullu siunertanut atorneqarnissaa nassuiaasiullugu sanaartorneqarsimanera pissutigalugu taama pisoqarpoq. Kingornali paasinarsivoq qaartartunik 600-nik sermersuup iluani inissiinissaq assartuinissarlu siunertarineqartoq.
- Suliakka ikinngutinnut, ilisarisimasannut ilaquttannullu oqaatigissanngikkikka sakkortuumik erseqqissaatigineqarpoq, Erik Jørgen-Jensen Danmarkip Radioanut taama oqarpoq.
Camp Centurymi saliinissaq kingusinaareersoq
Erik Jørgen-Jensenip atorfeqarsimanera ilumoornersoq ilumuunnginnersorluunniit FE-p Danmark Radioanut uppernarsarumanngilaa.
Passianili pisoqqami takuneqarsinnaavoq Pituffimmiittarsimasoq, Camp Centurylu 1960-ikkunni Pituffiup ataani inissisimatinneqarluni, soorlu aamma Camp Centurymit assilisat seqersittakkat 500-nit amerlanerusut pigigai.
AAMMA ATUARUK Danmarkip USA saliinissamut tunngatillugu saaffigisimanngilaa
Erik Jørgen-Jensenip Camp Centurymiinnermini ullorsiutaani atuarneqarsinnaavoq atomimik nukissiorfik Camp Centurymiittoq FE-p ernumanartoqartikkaa. Tamatumali saniatigut sakkutooqarfimmi sunik pisoqarnera danskit illersornissamut qullersaqarfiata annertunerusumik ilisimasaqarfigisimanngilaa.
Erik Jørgen-Jensen maanna sooq sassarnerminik aperineqarami akivoq Camp Centurymi pissutsit pillugit suli eqqaamannittunit kingulissanut paasititsinissaq pingaartillugu.
Qinngornernik ulorianartunik annertuumik aniatitsisoq
Kilitsissiaasimasup piviusulersaarummi ilaatigut oqaluttuaraa amerikamiu kaptajni John Page atomimik nukissiorfimmut akisussaasuusoq. Taanna - Erik Jørgen-Jensen naapertorlugu - qinngornerit ulorianartut pissutigalugit toqqutigisassaminik napparsimalernerminik nalunaarfigineqareerluni angerlaannartariaqarsimavoq.
AAMMA ATUARUK Sakkutooqarfiusimasut salinneqarnissaannut immikkoortinneqartut amerlineqartut
Amerikamiut logbogii Camp Centurymeersut naapertorlugit, qinngornernik ulorianartunik aniatitsinerup qummut killiliussaq ataateqqagaluarpaa. Tamanna Danmarkip Atomimik nukissiorneq pillugu ataatsimiititaliarsuanit aamma nakkutigineqarlunilu akuerineqarpoq, aamma imikumik qinngornernik ulorianartunik akulimmik kuutsitsineq ataatsimiititaliarsuarmit akuerineqarpoq.
Taamaattoqaraluartorli danskit naalakkersuisuisa Camp Centurymi avatangiisitigut pissutsinik misissuinissamik aallartitsisimanngillat. Tamannali aamma iluaqutaanavianngitsoq, Erik Jørgen-Jensen isumaqarpoq.
- Saliinissamik eqqarsartoqalernera ukiunik 40-nik kingusinaarpoq - immaqa ukiunik 50-inik.
Radiukkut piviusulersaarut ”Manden uden skygge” pingasunik immikkoortortaqarpoq. Immikkoortullu pingajuat kingullersaallu Danmarkip Radioatigut P1-ikkut maajip tallimaani aallakaatinneqassaaq.
