Camp Century: USA-p mingutsitsinermut akisussaaffia danskit naalakkersuisuisa misissuiffigigaat
USA-p nunatsinni sakkutooqarfigisimasaani mingutsitsinermik saliinissamut piumasaqaateqarluni Naalagaaffeqatigiit amerikamiut naalakkersuisuinut akiligassamik nassiussisinnassappat?
Nunanut allanut tunngasunut ministereqarfiup kammeradvokatillu naalagaaffiit akornanni inatsisinik immikkut ilisimasallip apeqqut taanna pillugu nalunaarusiaq saqqummiunneqartussaq inaarsaleruttorpaat.
AAMMA ATUARUK Ataatsimiititaliaq Camp Century pillugu paasissutissanik amerlanerusunik ujartuisoq
Camp Century pillugu Folketingimi marlunngornermi isumasioqatigiittoqarnerani danskit nunanut allanut tunngasunut ministeriat Anders Samuelsen taama ilisimatitsivoq.
Imikumik qinngornernik ulorianartumik akulimmik Sermersuarmi kuutsitsisoqartarsimanera, isumaqatigiissutillu sorliit atorlugit Danmark nunatsinni Camp Centurymik pilersitsinissamut ingerlatsinissamullu 1950¬-ikkut naanerini 1960-ikkullu aallartinnerini USA-mut akuersissuteqarsimanersoq isumasioqatigiinnermi ilaatigut oqaluuserineqarput.
AAMMA ATUARUK Danmarkip USA saliinissamut tunngatillugu saaffigisimanngilaa
Ataatsimiinneq ilaatigut Nunatta Qitornaaneersup Aleqa Hammondip apeqqutigisaanik tunngaveqarpoq, taassumalu paaserusuppaa USA nunatsinni sakkutooqarfigisimasamini mingutsitsisoqarsimaneranut akisussaasuutinneqarsinnaanersoq.
Mingutsitsineq pillugu akisussaaffik pillugu nalunaarusiaq naammasseriarpat Naalakkersuisunut siulliullugu tunniunneqassasoq, Samuelsenip ilisimatitsissutigaa.
AAMMA ATUARUK Saliinissaq pillugu isumaqatigiissuteqarnera allagaatitoqqami paasineqartoq
