Timmisartunut inuttaqanngitsunut Tunumi mittarfiliornissaq kissaatigineqartoq
Sakkutuujunngitsut mittarfiata Ittoqqortoormiit eqqaani Nerlerit Inaanniiittup matuneratigut sakkutuullu sakkutuujunngitsullu timmisartorneri Sakkutuut mittarfeeraannut Mestersvigimut katersuunneratigut tamanna pissasoq suliffeqarfiup siunnersuutigaa.
- Ilisimatusarnerup, ingammik avatangiisinik Tunumi ilisimatusarnerup, pitsanngorsarnissaa siunertaavoq, Michael Thorsen suliffeqarfimmi Integra A/S-imi pisortaq oqarpoq.
Suliffeqarfik taanna timmisartunik suliaqarfinnik atuisunut siunnersuisarpoq, timmisartunillu inuttaqanngitsunik suliaqartarluni.
Aamma atuaruk Timmisartuaqqat ungasianit aquttakkat qaammataasallu Issittumi atorneqalernissaat kaammattuutigigaat
Timmisartunut inuttaqanngitsunut mittarfeqartariaqarpoq
Suliffeqarfiup ilisimatusarfiit Station Nord, Zackenberg Villum Reserch Centerilu Tunup avannaarsuani nunamik avatangiisinillu annertuumik nakkutilliiffinni, timmisartunik inuttaqanngitsunik ikiorusuppai
Taamaattoqassappalli timmisartunik inuttaqanngitsunik aallartitsisarfissamik pitsaasumik pisariaqartitsivugut, Michael Thorsen oqarpoq.
- Tunumi timmisartunut inuttaqanngitsunut anngajaanut mittarfeqartariaqarpugut. Timmisartut inuttaqanngitsut Nuummi illoqarfinnilu allani takussaasunit aallaanerupput, tassami anginerugami. Sului 3,5 meterinit 20 meterisut takitigipput.
Aamma atuaruk Dronningi tikinngitsooraluartoq Villum Research Station atoqqaarfissiorneqarpoq
Aamma atuaruk Silap pissusiata allanngoriartornerata sunniutai misissuivimmit nutaamit misissorneqalersut
Mestersvig mittarfissatut piukkunnarpoq
Taakkununngalu mittarfissatut Sakkutuut mittarfiat Mestersvig piukkunnarpoq. Suliffeqarfiummi Sakkutuut atortui atorsinnaavai. Mestersvigilu Nerlerit Inaannit pitsaaneruvoq.
- Mestersvigip inissisimanera pitsaavoq. Takusinnaavarput aaqqissuussineq pisariaqartitarput tassaniittoq. Paasivarpullu mittarfeqarfiit Tunumi pisussat ataatsimoortikkaanni pitsaanerusinnaasoq.
Suliffeqarfiup Mittarfeqarfiit suleqatigalugit Mestersvigimi mittarfeqarnissaq sulissutigerusuppaa.
- Taamannat angallannermut tunngasunik aaqqissuussinermi aningaasartuutit ilai taamaalilluta uagut akilissavagut.
Suliffeqarfiup naatsorsuusiaani takuneqarsinnaavoq Sakkutuut mittarfiat Mestersvigimiittup allinera taamaalilluni sakkutuut sakkutuujunngitsullu timmisartuutaannut naammattunngorlugu, 19 millionit koruunit missaannik akeqassasoq.
Integra A/Sip Namminersorlutik Oqartussat Ilulissani mittarfissap uuttortarneranik timmisartunik inuttaqanngitsunik ullumi ikioreerpaa.
Suliffeqarfiup Illersornissamut ataatsimiititaliaq Folketingillu Kalaallit Nunaannut tunngasunut ataatsimiititaliaa Mestersvigimi mittarfiup sakkutuut sakkutuujunngitsullu ataatsimoortinnissaanik isuma pillugu naapeqatigerusuppai.
