Timmisartuaqqat ungasianit aquttakkat qaammataasallu Issittumi atorneqalernissaat kaammattuutigigaat
Qeqertarujussuarmi nunaqarpugut, angallaviginiarneralu akisullunilu pisariulluni. Ilaatigut tamanna pissutigalugu Kalaallit Nunaat aamma Danmark Issittumi timmisartuaqqanik ungasianit aquttakkanik qaammataasanillu atuineruleraluarpata, ilisimatusarnermut, sakkutooqqarnermut aamma sakkutuujunngitsunut angisuumik iluaqutaassagaluarpoq. Nalunaarusiami DTU Spacemit aamma Polar DTU-mit ullumi saqqummiunneqartumi pingaarnertut taama inerniliisoqarpoq.
- Sakkutuut Danmarkimilu oqartussat Issittumi suliatik annertunerulersinniarunikkit, silaannakkut atortulersuutinik isumaginneqqaarnissaat pingaaruteqarluinnarpoq, tamannami issittumik nakkutilliinerulernermik kinguneqartussaammat, Niels Andersen Polar DTU-mi pisortaq nalunaarusiap saqqummiunneqarneranut atatillugu oqarpoq.
AAMMA ATUARUK Timmisartunik inuttaqanngitsunik qaammataasanillu nakkutilliisoqalissaaq
Issittumi silaannakkut atortulersuutinut aningaasaliinikkut, Naalagaaffeqatigiit Issittumi maanna suliassaannut iluaqutaaginnarani, Naalagaaffeqatigiinni siunissami ineriartortitsissaaq naleqarnerulersitsillunilu.
Timmisartuaqqat ungasianit aquttakkat, qaammataasat peqatigalugit, attaveqaqatigiinnermut, nakkutilliinermut, sumiissusersiornermut nunallu assiliornerata pitsaanerulernerinik kinguneqassapput.
DTU Spacemit inaarutaasumik nalunaarusiaq ukiormanna kingusinnerusukkut saqqummersussaavoq.
