ASSIT Dronningi tikinngitsooraluartoq Villum Research Station atoqqaarfissiorneqarpoq
Qalasersuarmiilli 900 kilometerisut ungasitsigisumi sila ajormat Ataqqinartorsuaq Dronning Margrethe naalakkersuisullu siulittaasut Kim Kielsen tikinngitsoorput, Villum Fondenip Aarhus Universitetillu ammaanersiuinerat peqataaffigisussaagaluarpaat.
Piviusut: Villum Research Station
- Station Nordimiippoq
- Silaannaap pissusaanik ilisimatusarneq sammineqassaaq
- Ilisimatusartunut 14-inut inissaqarpoq
- Angallateqarpoq nunakkoorutinik laboratoriaqarlunilu angallattakkanik
- Ilisimatusartut nuna, siku, imaq silaannarlu misissorsinnaavaat
- Aarhus Universitetimit aqunneqarpoq
- Sanaartorneq pilersitsinerlu70,5 mio. kr.-nik akeqarpoq, Villum Fondenimillu akilerneqarluni
Tikittussat tikinngitsoormata Villum Fondenip siulersuisuini siulittaasup Jens V. Kann-Rasmussenip Villum Research Station, angusaqarluareersoq, atoqqaarfissiuinnarpaa.
Nunarsuaq tamakkerlugu silap pissusianik ilisimatusartut unnuinissanik 1.700-nit amerlanernik pilersaaruteqalereerput, tamannalu professorip ilisimatusarnermillu Villum Research Stationimi pisortamit, Henrik Skovimit nuannaarutigineqaqaaq.
Taassumalu Villum Fondeni, Namminersorlutik Oqartussat Illersornissaqarfillu qujaffigai, taakkumi ilisimatusarnermik ingerlatsiviup ammarsinnaanera piviusunngortimmassuk. Henrik Skovilli ilanngullu eqqaasississutigaa sooq Villum Research Station taama pingaartiginersoq.
- Silaannaap kianneruleriartornera maani issittumi nunarsuup sinneranit sukkanerussasoq ilimagaarput, Tunup avannaarsuanilu kiassuseq 9 gradimik kiannerulissaaq.
- Silaannaap taama sukkatigisumik kiannerulernera qanoq nunarsuup kaaviaarneranut sunniuteqassanersoq sianiginngilarput. Tupannartunik pisoqariasaarsinnaavoq, soorlu kiatsittoornerani nunap qeriuaannartup aanneratigut gassi metani annertuumik silaannarmut anialersinnaavoq, professor Henrik Skov Aarhus Universitetip nittartagaani taama issuaavigineqarpoq.
Villum Fonden katillugu 17,5 millioni koruuninik sanaartornermut, laboratorianut atortussanullu, ilaatigut laboratoriat angallattakkat, timmisartut inuttaqanngitsut, qamuteralaat allallu, tunniussisimavoq.
Pinngortitaleriffiup Namminersorlutillu Oqartussat illut pissavaat, Aarhus Universititillu Villum Research Stationimi ilisimatusarneq aqussallugu.
Billedtekster:
- VILLUM FONDEN-imit Aarhus Universitetimillu Station Nordimi juulip arfineq pingajuanni atoqqaarfissiortitsinermi peqataasut. Saamerlermiit: Illumi pisortaq Bent Lorentzen, ST Aarhus Universitet; dekan, ST Aarhus Universitet Niels Chr. Nielsen; institutimi pisortaq, Institut for Miljøvidenskab, ST, Aarhus Universitet Carsten Suhr Jacobsen; VILLUM FONDEN-imi siulersuisuini pisortaq Jens Kann-Rasmussen; ilisimatusarnermut pisortaq VRS, Aarhus Universitet Henrik Skov; centerimi pisortaq, Arctic Research Center, Aarhus Universitet Søren Rysgaard; (issiasoq) filmiliornermik ingerlatsisoq Martin Breum; VILLUM FONDEN-ip pisortaa, Lars Hansen; (issiasoq) filmiliornermi asiliisoq Jakob Gottschau attaveqaqatigiinnermullu pisortaq, Aarhus Universitet Anders Correll.
- Station Nordimi putserpoq.
- Station Nordimi mittarfik.
- VILLUM FONDEN-ip suilersuisuini siulittaasoq, Jens V. Kann-Rasmussen, Villum Research Stationip illutaasa ilaasa silataanni.
- Dekan Niels Christian Nielsen Villum Research Stationip ammarnerani tikilluaqqusisoq.
- VILLUM FONDEN-ip siulersuisuini siulittaasup, Jens V. Kann-Rasmussen, ammaanersiornermi allagartaq nuisippaa, Ataqqinartorsuaq Dronning Margrethe naalakkersuisullu siulittaasuat Kim Kielsen Station Nordip putsernera pillugu tikissinnaanngimmata.
- Villum Research Stationimi professor ilisimatusarnermullu pisortaq, Henrik Skov, VILLUM FONDENip aningaasaliineranut qujassuteqarpoq, Namminersorlutillu Oqartussanut Illersornissaqarfimmullu Villum Research Stationip piviusunngortinnissaanut suleqatigiilluarnermut qujaffigai.
- Villum Research Stationimi ilisimatusarnermut pisortaq nuannaatoq.
VILLUM FONDENip siulersuisuini siulittaasup Jens V. Kann-Rasmussenip ilisimatusarnermik ingerlatsivittaaq aataami, Villum Kann-Rasmussenip, assinganik tunivaa. Villum Kann-Rasmussen 1933-imi Lauge Kochip Kalaallit Nunaanni ukiut pingasut ingerlaneranni paasisassarsiorluni angalanerani aquuteralammi aquttuusimavoq.
- (Assi nutaannginneq) Villum Research Stationip eqqaani sikup ataata kissassusaa tarajoqassusaalu uuttortarneqarput CTD atorlugu.
- (Assi nutaannginneq) Villum Research Stationip eqqaani sikup ataata kissassusaa tarajoqassusaalu uuttortarneqarput CTD atorlugu.
