Naalakkersuisut siulittaasuata Múte B. Egedep danskit naalakkersuisuiinik ilaatigut isornartorsiuingaatsiarnerata kingorna spiralilersuisoqarneranik suliami kiisami nikeriartoqaqqippoq.

Danmarkimmi nunattalu spiralilersuisoqarneranik nakerisarsiunngitsumik qulaajaaneq maanna aallartillugu tusagassiuutinut ullumi nalunaarutigaat.

Danskit naalakkersuisuisa nunatsinnilu naalakkersuisut qulaajaasoqarnissaanik isumaqatigiissuteqarneranit ukiup affaa qaanngiuppoq. Danskit nunamut imminermut peqqissutsimullu ministeriata, Sophie Løhdep (V) oqarnera naapertorlugu tamanna danskit folketingimut qinersinerannit ilisimatusartunillu piukkunnartunik toqqaaniarneq ajornakusoorneranik pissutigalugit tamanna kinguaattoorutigineqarpoq.

Ilisimatusartut inissinneqartut

Qulaajaasoqarnissaatali kinguaattoorutigineqarnerata sapaatip akunnerani kingullermi ukkatarineqangaatsiarnera nikeriartitsiviusimarpasippoq, ilisimatusartunillu ilaatigut Ilisimatusarfimmit, Københavns Universitetimit Syddansk Universitetimiillu maanna suliamik qulaajaasoqartussanngorpoq.

Suliami uani pingaaruteqartumi qulaajaalernissarput qilanaaraarput. Qulaajaaneq ilisimatusarfiit attuumassutilinnillu suliallit ilisimasaannit, oqaluttuarisaanermi pigisanit inunnillu suliami attuumassuteqartunit apersuinernit tunngaveqassaaq. Arnat ataasiakkaat tamarmik immikkut oqaluttuami saqqummiunnissaat pingaaruteqarpoq, Ilisimatusarfimmi Issittumi Atugarissaarnermik Ilisimatusarfimmi aqutsisoq, kiisalu Syddansk Universitetimi Center for Folkesundhed i Grønlandimi ilisimatusartuuneq, Tenne Jensen oqarpoq. Taassumalu ilisimatusartoqatigiinnik aqutsisussatut toqqarneqarpoq.

Meeqqanut, inuussuttunut, ilaqutariinnut peqqissutsimullu Naalakkersuisup, Mimi Karlsenip (IA) suliap aallartinneqarnissaa aamma qilanaarutigaa:

- Arnanut pineqartunut inuiaqatigiinnullumi pingaaruteqarpoq qulaajaaneq maanna kiisami aallartinneqarsinnaalermat. Peqataasunit oqaluttuat pingaaruteqarput suliaq tamakkiisumik qulaajarneqassappat. Ilisimatuut sulilluarnissaannik kissaappakka suliamilu inernerinik saqqummiussinissaat qilanaaralugu.

Danskit nunamut imminermut, peqqissutsimullu ministeriata, Sophie Løhdep nunatta Danmarkillu akornanni ataatsimut oqaluttuarisaanerput nuanniitsunik saqqummersinneqartarnissaanik pingaaruteqartunik ilaqartoq nassuerutigaa. Taamaammallu misissuisoqarnissaa aamma pingaaruteqarsoraa:

- Taamaattumik qujanarpoq suliaq nuanninngitsoq qulaajaaffigalugu maanna aallartilermat aamma ilisimatuut arlaannaanulluunniit attuumassuteqanngitsut oqaluttuarisaanermi pissarsiffinnik arnallu pineqartut uppernarsaanerinik sukumiisumik misissuisinnaalermata.

Nunatsinni peqqinnissamut oqartussaaffiup nunatsinnit tiguneqarnissaata tungaanut piffissami 1960-imit 1991-imut pisimasut qulaajarneqassapput. Qulaajaaneq 2025-mi maajimi naammassinissaa naatsorsuutigineqarpoq.